6076. පදුමුත්තරො නාම ජිනො සබ්බධම්මෙසු චක්ඛුමා,
ඉතො සතසහස්සම්හි කප්පෙ උප්පජ්ජි නායකො.

6077. සීලං තස්ස අසඞ්ඛෙය්යං සමාධි වජිරූපමො,
අසඞ්ඛෙය්යං ඤාණවරං විමුත්ති ච අනූපමා.

6078. මනුජාමරනාගානං බ්රහ්මානං ච සමාගමෙ,
සමණබ්රාහ්මණාකිණ්ණෙ ධම්මං දෙසෙසි නායකො.

6079. සසාවකං මහාලාභිං පුඤ්ඤවන්තං ජුතින්ධරං,
ඨපෙසි එතදග්ගම්හි පරිසාසු විසාරදො.

6080. තදාහං ඛත්තියො ආසිං නගරෙ හංසසව්හයෙ,
සුත්වා ජිනස්ස තං වාක්යං සාවකස්ස ගුණං බහුං.

6081. නිමන්තයිත්වා සත්තාහං භොජයිත්වා සසාවකං,
මහාදානං දදිත්වාන තං ඨානමභිපත්ථයිං.

6082. තදා මං විනතං පාදෙ දිස්වාන පුරිසාසභො,
සුස්සරෙන මහාවීරො ඉදං වචනමබ්රවී:

6083. තතො ජිනස්ස වචනං සොතුකාමා මහාජනා,
දෙවදානවගන්ධබ්බා බ්රහ්මානො ච මහිද්ධිකා.

6084. සමණබ්රාහ්මණා චෙව නමස්සිංසු කතඤ්ජලී,
නමො තෙ පුරිසාජඤ්ඤ නමො තෙ පුරිසුත්තම.

6085. ඛත්තියෙන මහාදානං දින්නං සත්තාහිකං හි වො,
සොතුකාමා ඵලං තස්ස ව්යාකරොහි මහාමුනෙ.

6086. තතො අවොච භගවා සුණාථ මම භාසිතං,
අප්පමෙය්යම්හි බුද්ධම්හි සඞ්ඝම්හි සුප්පතිට්ඨිතා.

6087. දක්ඛිණා තාය කො වත්තා අප්පමෙය්යඵලා හි සා,
අපිචෙස මහාභොගො ඨානං පත්ථෙති උත්තමං.

6088. ලාභී විපුල්ලාභානං යථා භික්ඛු සුදස්සනො,
තථාහම්පි භවෙය්යන්ති ලච්ඡතෙතං අනාගතෙ.

6089. සතසහස්සෙ ඉතො කප්පෙ ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.

6090. තස්ස ධම්මෙසු දායාදො ඔරසො ධම්මනිම්මිතො,
සීවලි නාම නාමෙන හෙස්සති සත්ථුසාවකො.

6091. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසූපගො අහං.

6092. එකනවුතෙ ඉතො කප්පෙ විපස්සී ලොකනායකො,
උප්පජ්ජි චාරුනයනො සබ්බධම්මවිපස්සකො.

6093. තදාහං බන්ධුමතියං කුලස්සඤ්ඤතරස්ස ච,
දයිතො පත්ථිතො චෙව ආසිං කම්මන්තව්යාවටො.

6094. තදා අඤ්ඤතරො පූගො විපස්සිස්ස මහෙසිනො,
පරිවෙසං අකාරෙසි මහන්තමතිවිස්සුතං.

6095. නිට්ඨිතෙ ච මහාදානෙ දදං ඛජ්ජකසංහිතං,
නවං දධිං මධුං චෙව විචිනං නෙව අද්දස.

6096. තදාහං තං ගහෙත්වාන නවං දධිං මධුම්පි ච,
කම්මස්සාමිඝරං ගච්ඡිං තමෙසන්තා මමද්දසුං.