6118. පදුමුත්තරො නාම ජිනො සබ්බධම්මෙසු චක්ඛුමා,
ඉතො සතසහස්සම්හි කප්පෙ උප්පජ්ජි නායකො.

6119. යථාපි සාගරෙ ඌමි ගගනෙ විය තාරකා,
එවං පාවචනං තස්ස අරහන්තෙහි චිත්තිතං.

6120. ස දෙවාසුරනාගෙහි මනුජෙහි පුරක්ඛතො,
සමණබ්රාහ්මණාකිණ්ණෙ ජනමජ්ඣෙ ජනුත්තමො.

6121. පභාභි අනුරඤ්ජෙන්තො ලොකං ලොකන්තගූ ජිනො,
වචනෙන විබොධෙන්තො වෙනෙය්යපදුමානි සො.

6122. වෙසාරජ්ජෙහි සම්පන්නො චතූහි පුරිසුත්තමො,
පහීනභයසාරජ්ජො ඛෙමප්පත්තො විසාරදො.

6123. ආසභං පවරං ඨානං බුද්ධභුමිං ච කෙවලං,
පටිජානාති ලොකග්ගො නත්ථි සඤ්චොදකො ක්වචි.

6124. සීහනාදමසම්භීතං නදතො තස්ස තාදිනො,
දෙවො නරො වා බ්රහ්මා වා පටිවත්තා න විජ්ජති.

6125. දෙසෙන්තො පවරං ධම්මං සන්තාරෙන්තො සදෙවකං,
ධම්මචක්කං පවත්තෙති පරිසාසු විසාරදො.

6126. පටිභානවතං අග්ගං සාවකං සාධුසම්මතං,
ගුණං බහුං පකිත්තෙත්වා එතදග්ගෙ ඨපෙසි තං.

6127. තදාහං හංසවතියං බ්රාහ්මණො සාධුසම්මතො,
සබ්බවෙදවිදූ ජාතො වඞ්ගීසො වාදිසූදනො.

6128. උපෙච්ච තං මහාවීරං සුත්වා තං ධම්මදෙසනං,
පීතිවරං පටිලභිං සාවකස්ස ගුණෙ රතො.

6129. නිමන්තයිත්වා සුගතං සසඞ්ඝං ලොකනන්දනං,
සත්තාහං භොජයිත්වාහං දුස්සෙහච්ඡාදයිං තදා.

6130. නිපච්ච සිරසා පාදෙ කතොකාසො කතඤ්ජලී,
එකමන්තං ඨිතො හට්ඨො සන්ථවිං ජිනමුත්තමං:

6131. “නමො තෙ වාදිසද්දූල නමො තෙ පුරිසුත්තම,
නමො තෙ සබ්බලොකග්ග නමො තෙ අභයඞ්කර.

6132. නමො තෙ මාරමථන නමො තෙ දිට්ඨිසූදන,
නමො තෙ සන්තිසුඛද නමො තෙ සරණඞ්කර.

6133. අනාථානං භවං නාථො භීතානං අභයප්පදො,
විස්සාමභූමි සත්තානං සරණං සරණෙසිනං.