6056. පදුමුත්තරො නාම ජිනො සබ්බධම්මෙසු චක්ඛුමා,
ඉතො සතසහස්සම්හි කප්පෙ උප්පජ්ජි නායකො.

6057. සීහහනු බ්රහ්මගිරො හංසදුන්දූභිනිස්සරො,
නාගවික්කන්තගමනො චන්දසූරාධිකප්පභො.

6058. මහාමතී මහාවීරො මහාඣායී බහාබලො,
මහාකාරුණිකො නාථො මහාතමපනූදනො.

6059. සකදාචි තිලොකග්ගො වෙනෙය්යෙ විනයං බහු,
ධම්ම දෙසෙසි සම්බුද්ධො සත්තාසයවිදූ මුනි.

6060. ඣායිං ඣානරතං වීරං උපසන්තං අනාවිලං,
වණ්ණයන්තො පරිසතිං තොසෙසි ජනතා ජිනො.

6061. තදාහං හංසවතියං බ්රාහ්මණො වෙදපාරගූ,
ධම්මං සුත්වාන මුදිතො තං ඨානමභිපත්ථයිං.

6062. තදා ජිනො වියාකාසි සඞ්ඝමජ්ඣෙ විනායකො,
මුදිතො හොහි ත්වං බ්රහ්මෙ ලච්ඡසෙ තං මනොරථං.

6063. සතසහස්සෙ ඉතො කප්පෙ ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.

6064. තස්ස ධම්මෙසු දායාදො ඔරසො ධම්මනිම්මිතො,
රෙවතො නාම නාමෙන හෙස්සසි සත්ථුසාවකො.

6065. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහි තාවතිසමගච්ඡහං.

6066. පච්ඡිමෙ ච භවෙ දානි ජාතොහං කොලියෙ පුරෙ,
ඛත්තියෙ කුලසම්පන්නෙ ඉද්ධෙ ඵීතෙ මහද්ධනෙ.

6067. යදා කපිලවත්ථුස්මිං බුද්ධො ධම්මමදෙසයි,
තදා පසන්නො සුගතෙ පබ්බජිං අනගාරියං.

6068. කඞ්ඛා මෙ බහුලා ආසි කප්පාකප්පෙ තහිං තහිං,
සබ්බං තං විනයී බුද්ධො දෙසෙත්වා ධම්මමුත්තමං.

6069. තතොහං තිණ්ණසංසාරො සදා ඣානසුඛෙ රතො,
විහරාමි තදා බුද්ධො මං දිස්වා එතදබ්රවි:

6070. යං කාචි කඞ්ඛා ඉධ වා හුරං වා,
සකවෙදියා වා පරවෙදියා වා:
යෙ ඣායිනො තා පජහන්ති සබ්බා
ආතාපිනො බ්රහ්මචරියං චරන්තා.