5769. පදුමුත්තරො නාම ජිනො සබ්බලොකවිදූ මුනි,
ඉතො සතසහස්සම්හි කප්පෙ උප්පජ්ජි චක්ඛුමා.

5770. ඔවාදකො විඤ්ඤාපකො තාරකො සබ්බපාණිනං,
දෙසනාකුසලො බුද්ධො තාරෙසි ජනතං බහුං.

5771. අනුකම්පකො කාරුණිකො හිතෙසී සබ්බපාණිනං,
සම්පත්තෙ තිත්ථියෙ සබ්බෙ පඤ්චසීලෙ පතිට්ඨපි

5772. එවං නිරාකුලං ආසි සුඤ්ඤතං තිත්ථියෙහි ච,
විචිත්තං අරහන්තෙහි වසීභූතෙහි තාදිහි.

5773. රතනානට්ඨපඤ්ඤාස උග්ගතො සො මහාමුනි,
කඤ්චනග්ඝියසඞ්කාසො බත්තිංසවරලක්ඛණො.

5774. වස්සසතසහස්සානි ආයු විජ්ජති තාවදෙ,
තාවතා තිට්ඨමානො සො තාරෙසි ජනතං බහුං.

5775. තදාහං හංසවතියා සෙට්ඨිපුත්තො මහායසො,
උපෙත්වා ලොකපජ්ජොතං අස්සොසිං ධම්මදෙසනං.

5776. සෙනාසනානි භික්ඛූනං පඤ්ඤාපෙන්තං සසාවකං,
කිත්තයන්තස්ස වචනං සුණිත්වා මුදිතො අහං.

5777. අධිකාරං සසඞ්ඝස්ස කත්වා තස්ස මහෙසිනො,
නිපච්ච සිරසා පාදෙ තං ඨානමභිපත්ථයිං.

5778. තදා භාසි මහාවීරො මම කම්මං පකිත්තයං,
යො සසඞ්ඝමභොජෙසි සත්තාහං ලොකනායකං.

5779. සොයං කමලපත්තක්ඛො සීහංසො කනකත්තවො,
මම පාදමූලෙ නිපතී පත්ථයං ඨානමුත්තමං.

5780. සහසහස්සෙ ඉතො කප්පෙ ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.

5781. සාවකො තස්ස බුද්ධස්ස දබ්බො නාමෙන විස්සුතො,
සෙනාසනපඤ්ඤාපකො අග්ගො හෙස්සති’යං තදා.

5782. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

5783. සතානං තීණික්ඛත්තුඤ්ච දෙවරජ්ජමකාරයිං,
සතානං පඤ්චක්ඛත්තුඤ්ච චක්කවත්තී අහොසහං.

5784. පදෙසරජ්ජං විපුලං ගණනාතො අසංඛියං,
සබ්බත්ථ සුඛිතො ආසිං තස්ස කම්මස්ස වාහසා.

5785. එකනවුතෙ ඉතො කප්පෙ විපස්සී නාම නායකො,
උප්පජ්ජි චාරුනයනො සබ්බධම්මවිපස්සකො.

5786. දුට්ඨචිත්තො උපවදිං සාවකං තස්ස තාදිනො,
සබ්බාසවපරික්ඛීණං සුද්ධොති ච විජානිය.

5787. තස්සෙව නරවීරස්ස සාවකානං මහෙසිනං,
සලාකං පග්ගහෙත්වාන ඛීරොදනමදාසහං.

5788. ඉමම්හි භද්දකෙ කප්පෙ බ්රහ්මබන්ධු මහායසො,
කස්සපො නාම නාමෙන උප්පජ්ජි වදතං වරො.

5789. සාසනං ජොතයිත්වා සො අභිභුය්ය කුතිත්ථියෙ,
වෙනෙය්යෙ විනයිත්වාන නිබ්බුතො සො සසාවකො.

5790. සසිස්සෙ නිබ්බුතෙ නාථෙ අත්ථමෙන්තම්හි සාසනෙ,
දෙවා කන්දිංසු සංවිග්ගා මුත්තකෙසා රුදම්මුඛා.