5811. ඉතො සතසහස්සම්හි කප්පෙ උප්පජ්ජි නායකො,
සබ්බලොකහිතො වීරො පදුමුත්තරනාමකො.

5812. තදාහං බ්රාහ්මණො හුත්වා විස්සුතො වෙදපාරගූ,
දිවාවිහාරං විවරං අද්දසං ලොකනායකං.

5813. චතුසච්චං පකාසෙන්තං බොධයන්තං සදෙවකං,
විචිත්තකථිකානග්ගං වණ්ණයන්තං මහාජනෙ.

5814. තදා මුදිතචිත්තොහං නිමන්තෙත්වා තථාගතං,
නානාරත්තෙහි වත්ථෙහි අලඞ්කත්වාන මණ්ඩපං.

5815. නානාරතනපජ්ජොතං සසඞ්ඝං භොජයිං තහිං,
භොජයිත්වාන සත්තාහං නානග්ගරසභොජනං.

5816. නානාවණ්ණෙහි පුප්ඵෙහි පූජයිත්වා සසාවකං,
නිපජ්ජ පාදමූලම්හි තං ඨානං පත්ථයිං අහං.

5817. තදා මුනිවරො ආහ කරුණෙකරසාසයො,
පස්සථෙතං දිජවරං පදුමානනලොචනං.

5818. පීතිපාමොජ්ජබහුලං සමුග්ගතතනූරුහං,
හාසාහිතවිසාලක්ඛං මම සාසනලාලසං.

5819. මම පාදමූලෙ පතිතං එකාවත්ත සුමානසං,
එස පත්ථෙති තං ඨානං විචිත්තකථිකත්තනං.

5820. සතසහස්සෙ ඉතො කප්පෙ ඔක්කාකකුලසම්භවො,
ගොතමො නාම ගොත්තෙන සත්ථා ලොකෙ භවිස්සති.

5821. තස්ස ධම්මෙසු දායාදො ඔරසො ධම්මනිම්මිතො,
කුමාරකස්සපො නාම හෙස්සති සත්ථුසාවකො.

5822. විචිත්තපුප්ඵදුස්සානං රතනානං ච වාහසා,
විචිත්තකථිකානං සො අග්ගතං පාපුණිස්සති.

5823. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

5824. පරිබ්භමං භවාකාසෙ රඞ්ගමජ්ඣෙ නටො යථා,
සාඛාමිගත්රජො හුත්වා මිගියා කුච්ඡිමොක්කමිං.

5825. තදා මයි කුච්ඡිගතෙ වජ්ඣවාරො උපට්ඨිතො,
සාඛෙන වත්තා මෙ මාතා නිග්රොධං සරණං ගතා.

5826. තෙන සා මිගරාජෙන මරණං පරිමොචිතා,
පරිච්චජිත්වා සං පාණං මමෙවං ඔවදී තදා.

5827. නිග්රොධමෙව සෙවෙය්ය න සාඛමුපසංවසෙ,
නිග්රොධස්මිං මතං සෙය්යො යං චෙ සාඛම්හි ජීවිතං.

5828. තෙනානුසිට්ඨො මිගයූථපෙන අහං ච මාතා ච තථෙතරෙ ච,
ආගම්ම රම්මං තුසිතාධිවාසං ගතා පවාසං සඝරං යථෙව.

5829. පුනො කස්සපවීරස්ස අත්ථමෙන්තම්හි සාසනෙ,
ආරුය්හ සෙලසිඛරං යුඤ්ජිත්වා ජිනසාසනං.