1215. පදුමුත්තරො ලොකවිදූ ආහුතීනං පටිග්ගහො,
ජනතං උද්ධරිත්වාන නිබ්බායති මහායසො.

1216. නිබ්බායන්තෙ ච සම්බුද්ධෙ දසසහස්සී පකම්පථ,
ජනකායො මහා ආසි දෙවා සන්නිපතුං තදා.

1217. වන්දනං පූජයිත්වාන තගරමල්ලිකාහි ච,
හට්ඨො හට්ඨෙන චිත්තෙන ආලෙපෙසිං නරුත්තමං.

1218. මම සඞ්කප්පමඤ්ඤාය සත්ථා ලොකෙ අනුත්තරො,
නිපන්නකොව සම්බුද්ධො ඉමා ගාථා අභාසථ:

1219. “යො මෙ පච්ඡිමකෙ කාලෙ ගන්ධමාල්යෙන ඡාදයී,
තමහං කිත්තයිස්සාමි සුණාථ මම භාසතො.

1220. ඉතො චුතො අයං පොසො තුසිතකායං ගමිස්සති,
තත්ථ රජ්ජං කරිත්වාන නිම්මානං සො ගමිස්සති.

1221. එතෙනෙව උපායෙන දත්වා මල්යං වරුත්තමං,
සකකම්මාභිරද්ධො සො සම්පත්තිං අනුභොස්සති.

1222. පුනාපි තුසිතෙ කායෙ නිබ්බත්තිස්සතයං නරො,
තම්හා කායා චවිත්වාන මනුස්සත්තං ගමිස්සති.

1223. සක්යපුත්තො මහානාගො අග්ගො ලොකෙ සදෙවකෙ,
බොධයිත්වා බහූ සත්තෙ නිබ්බායිස්සති චක්ඛුමා.

1224. පබ්බජ්ජූපගතො සන්තො සුක්කමූලෙන චොදිතො,
උපසඞ්කම්ම සම්බුද්ධං පඤ්හං පුච්ඡිස්සතී තදා.

1225. හාසයිත්වාන සම්බුද්ධො සබ්බඤ්ඤූ ලොකනායකො,
පුඤ්ඤකම්මං පරිඤ්ඤාය සච්චානි විවරිස්සති.

1226. ආරද්ධො ච අයං පඤ්හෙ තුට්ඨො එකග්ගමානසො,
සත්ථාරං අභිවාදෙත්වා පබ්බජ්ජං යාචයිස්සති.

1227. පසන්නමානසං දිස්වා සක්කම්මෙන තොසිතං,
පබ්බාජෙස්සති සො බුද්ධො අග්ගධම්මස්ස කොවිදො.

1228. වායමිත්වාන’යං පොසො සම්මාසම්බුද්ධසාසනෙ,
සබ්බාසවෙ පරිඤ්ඤාය නිබ්බායිස්සතනාසවො”.

1229. පුබ්බකම්මෙන සංයුත්තො එකග්ගො සුසමාහිතො,
බුද්ධස්ස ඔරසො පුත්තො ධම්මජො’ම්හි සුනිම්මිතො.

1230. ධම්මරාජං උපාගම්ම ආපුච්ඡිං පඤ්හමුත්තමං,
කථයන්තො ච මෙ පඤ්හං ධම්මසොතං උපානයී.

1231. තස්සාහං ධම්මමඤ්ඤාය විහාසිං සාසනෙ රතො,
සබ්බාසවෙ පරිඤ්ඤාය විහරාමි අනාසවො.

1232. සතසහස්සෙ ඉතො කප්පෙ ජලජුත්තරනායකො,
නිබ්බායි අනුපාදානො දීපො’ව තෙලසඞ්ඛයා.

1233. සත්තයොජනිකං ආසි ථූපඤ්ච රතනාමයං,
ධජං තත්ථ අපූජෙසිං සබ්බභද්දං මනොරමං.

1234. කස්සපස්ස ච බුද්ධස්ස තිස්සො නාමග්ගසාවකො,
පුත්තො මෙ ඔරසො ආසි දායාදො ජිනසාසනෙ.

1235. තස්ස හීනෙන මනසා වාචං භාසිං අභද්දකං,
තෙන කම්මවිපාකෙන පච්ඡිමෙ අද්දසං ජිනං.

1236. උපවත්තනෙ සාලවනෙ පච්ඡිමෙ සයනෙ මුනි,
පබ්බාජෙසි මහාවීරො හිතො කාරුණිකො ජිනො.

1237. අජ්ජෙව’දානි පබ්බජා අජ්ජෙව උපසම්පදා,
අජ්ජෙව පරිනිබ්බාණං සම්මුඛා දිපදුත්තමෙ.

1238. පටිසම්භිදා -පෙ- කතං බුද්ධස්ස සාසනං.