1191. සුමෙධො නාම සම්බුද්ධො ගච්ඡතෙ අන්තරාපණෙ,
ඔක්ඛිත්තචක්ඛු මිතභාණී සතිමා සංවුතින්ද්රියො.

1192. පඤ්ච උප්පලහත්ථානි ආවෙලත්ථං අහංසු මෙ,
තෙන බුද්ධං අපූජෙසිං පසන්නො සෙහි පාණිහි.

1193. ආරොපිතා ච තෙ පුප්ඵා ඡදනං ආසු සත්ථුනො,
සංසාවිංසු මහානාගං සිස්සා ආචරියං යථා.

1194. තිංසකප්පසහස්සම්හි යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

1195. ඉතො වීසකප්පසතෙ අහෙසුං පඤ්ච ඛත්තියා,
හත්ථියා නාම නාමෙන චක්කවත්තී මහබ්බලා.

1196. පටිසම්භිදා -පෙ- කතං බුද්ධස්ස සාසනං.

1197. නිබ්බුතෙ ලොකනාථම්භි විපස්සිම්හග්ගපුග්ගලො,
සුඵුල්ලං පදුමං ගය්හ චිතකමාරොපයිං අහං.

1198. ආරොපිතෙ ච චිතකෙ වෙහාසං නභමුග්ගමී,
ආකාසච්ඡදනං කත්වා චිතකම්භි අධාරයිං.

1199. එකනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

1200. සත්තතාළීසිතො කප්පෙ පදුමිස්සරනාමකො,
චාතුරන්තො විජිතාවී චක්කවත්තී මහබ්බලො.

1201. පටිසම්භිදා -පෙ- කතං බුද්ධස්ස සාසනං.

1202. සිද්ධත්ථස්ස භගවතො මෙත්තචිත්තස්ස තාදිනො,
සයනග්ගං මයා දින්නං දුස්සභණ්ඩෙහි අත්ථතං.

1203. පටිග්ගහෙසි භගවා කප්පියං සයනාසනං,
උට්ඨාය ආසනා තම්හා වෙහාසං උග්ගමී ජිනො.

1204. චතුනවුතෙ ඉතො කප්පෙ යං සයනමදාසහං,
දුග්ගතිං නාභිජානාමි සයනදානස්සිදං ඵලං.

1205. එකපඤ්ඤාසිතො කප්පෙ වරුණො දෙවසව්හයො,
සත්තරතනසම්පන්නො චක්කවත්තී මහබ්බලො.

1206. පටිසම්භිදා -පෙ- කතං බුද්ධස්ස සාසනං.

1207. අත්ථදස්සිස්ස මුනිනො ලොකජෙට්ඨස්ස තාදිනො,
ඉට්ඨකාහි චිනිත්වාන චඞ්කමං කාරයිං අහං.

1208. උච්චතො පඤ්චරතනං චඞ්කමං සාධු මාපිතං,
ආයාමතො හත්ථසතං භාවනීයං මනොරමං.

1209. පටිග්ගහෙසි භගවා අත්ථදස්සී නරුත්තමො,
හත්ථෙන පුලිනං ගය්හ ඉමා ගාථා අභාසථ: