5140. පබ්බතෙ හිමවන්තම්හි දෙවළො නාම තාපසො,
තත්ථ මෙ චඞ්කමො ආසි අමනුස්සෙහි මාපිතො.

5141. ජටාභාරෙන භරිතො කමණ්ඩලුධරො තදා,
උත්තමත්ථං ගවෙසන්තො පවනා අභිනික්ඛමිං.

5142. චුල්ලාසීතිසහස්සානි සිස්සා මය්හං උපට්ඨහුං,
සකකම්මාභිපසුතා වසන්ති පවනෙ තදා.

5143. අස්සමා අභිනික්ඛම්ම අකං පුලිනචෙතියං,
නානාපුප්ඵං සමානෙත්වා තං චෙතියමපූජයිං.

5144. තත්ථ චිත්තං පසාදෙත්වා අස්සමං පවිසාමහං,
සබ්බෙ සිස්සා සමාගන්ත්වා එතමත්ථමපුච්ඡු මං.

5145. “පුලිනෙන කතෙ ථූපෙ යං ත්වං දෙවං නමස්සසි,
මයම්පි ඤාතුමිච්ඡාම පුට්ඨො ආචික්ඛ නො තුවං”

5146. නිද්දිට්ඨා නො මන්තපදෙ චක්ඛුමන්තො මහායස,
තෙ ඛො අහං නමස්සාමි බුද්ධසෙට්ඨෙ මහායසෙ.

5147. “කීදිසා තෙ මහාවීරා සබ්බඤ්ඤූ ලොකනායකා,
කථං වණ්ණා කථං සීලා කීදිසා තෙ මහායසා?”

5148. බත්තිංසලක්ඛණා බුද්ධා චත්තාරීසද්විජාපි ච,
නෙත්තා ගොපඛුමා තෙසං ජිඤ්ජුකාඵලසන්නිභා.

5149. ගච්ඡමානා ච තෙ බුද්ධා යුගමත්තංව පෙක්ඛරෙ,
න තෙසං ජාණු නදති සන්ධිසද්දො න සුය්යති.

5150. ගච්ඡමානා ච සුගතා උද්ධරන්තාව ගච්ඡරෙ,
පඨමං දක්ඛිණං පාදං බුද්ධානං එස ධම්මතා.

5151. අසම්හිතා ච තෙ බුද්ධා මිගරාජාව කෙසරී,
නෙවුකක්කංසෙන්ති අත්තානං නො ච වම්භෙන්ති පාණිනං.

5152. මානාවමානතො මුත්තා සමා සබ්බෙසු පාණිසු,
අනත්තුක්කංසකා බුද්ධා බුද්ධානං එස ධම්මතා.

5153. උප්පජ්ජන්තා ච සම්බුද්ධා ආලොකං දස්සයන්ති තෙ,
ඡප්පකාරං පකම්පෙන්ති කෙවලං වසුධං ඉමං.

5154. පස්සන්ති නිරයං චෙතෙ නිබ්බාති නිරයො තදා,
පවස්සති මහාමෙඝො බුද්ධානං එස ධම්මතා.

5155. එදිසා තෙ මහානාගා අතුල්යා ච මහායසා,
වණ්ණතො අනතික්කන්තා අප්පමෙය්යා තථාගතා.

5156. අනුමොදිංසු මෙ වාක්යං සබ්බෙ සිස්සා සගාරවා,
තථා ච පටිපජ්ජිංසු යථාසත්ති යථාබලං.

5157. පතිපූජෙන්ති පුලිනං සකකම්මාභිලාසිනො,
සද්දහන්තා මමං වාක්යං බුද්ධත්තගතමානසා.

5158. තදා චවිත්වා තුසිතා දෙවපුත්තො මහායසො,
උප්පජ්ජි මාතුකුච්ඡිස්මිං දසසහස්සී පකම්පථ.

5159. අස්සමස්සාවිදූරම්හි චඞ්කමම්හි ඨිතො අහං,
සබ්බෙ සිස්සා සමාගන්ත්වා ආගච්ඡුං මම සන්තිකං.

5160. උසභො’ව මහී නදති මිගරාජා’ව කූජති,
සුංසුමාරො’ව සලති කිං විපාකො භවිස්සති.

5161. “යං පකිත්තෙමි සම්බුද්ධං සිකතාථූපසන්තිකෙ,
සො දානි භගවා සත්ථා මාතුකුච්ඡිමුපාගමි.”

5162. තෙසං ධම්මකථං කත්වා කිත්තයිත්වා මහාමුනිං,
උය්යොජෙත්වා සකෙ සිස්සෙ පල්ලඞ්කං ආභූජිං අහං.

5163. බලඤ්ච වත මෙ ඛීණං ව්යාධිතො පරමෙනහං,
බුද්ධසෙට්ඨං සරිත්වාන තත්ථ කාලකතො අහං.

5164. සබ්බෙ සිස්සා සමාගන්ත්වා අකංසු චිතකං තදා,
කලෙබරං ච මෙ ගය්හ චිතකං අභිරොපයුං.

5165. චිතකං පරිවාරෙත්වා සීසෙ කත්වාන අඤ්ජලිං,
සොකසල්ලපරෙතා තෙ විකන්දිංසු සමාගතා.