5177. අත්ථදස්සී තු භගවා සයම්භූ ලොකනායකො,
විනකානදියා තීරං උපගච්ඡි තථාගතො.

5178. උදකා අභිනික්ඛම්ම කච්ඡපො වාරිගොචරො,
බුද්ධං තාරෙතුකාමොහං උපෙසිං ලොකනායකං.

5179. අභිරූහතු මං බුද්ධො අත්ථදස්සී මහාමුනි,
අහං තං තාරයිස්සාමි දුක්ඛස්සන්තකරො තුවං.

5180. මම සඞ්කප්පමඤ්ඤාය අත්ථදස්සී මහායසො,
ආරුහිත්වාන මෙ පිට්ඨිං අට්ඨාසි ලොකනායකො.

5181. යතො සරාමි අත්තානං යතො පත්තොස්මිං විඤ්ඤුතං,
සුඛං මෙ තාදිසං නත්ථි ඵුට්ඨෙ පාදතලෙ යථා.

5182. උත්තරිත්වාන සම්බුද්ධො අත්ථදස්සී මහායසො,
නදීතීරම්හි ඨත්වාන ඉමා ගාථා අභාසථ.

5183. “යාවතා වත්තතෙ චිත්තං ගඞ්ගාසොතං තරාමහං,
අයඤ්ච කච්ඡපො රාජා තාරෙසි මම පඤ්ඤවා.

5184. ඉමිනා බුද්ධතරණෙන මෙත්තචිත්තවතාය ච,
අට්ඨාරසෙ කප්පසතෙ දෙවලොකෙ රමිස්සති.

5185. දෙවලොකා ඉධාගන්ත්වා සුක්කමූලෙන චොදිතො,
එකාසනෙ නිසීදිත්වා කඞ්ඛාසොතං කරිස්සති.”

5186. යථාපි භද්දකෙ ඛෙත්තෙ බීජමප්පම්පි රොපිතං,
සම්මාධාරෙ පවච්ඡන්තෙ ඵලං තොසෙති කස්සකං.

5187. තථෙවිදං බුද්ධඛෙත්තං සම්මාසම්බුද්ධදෙසිතං,
සම්මාධාරෙ පවච්ඡන්තෙ ඵලං මං තොසයිස්සති.

5188. පධානපහිතත්තොම්හි උපසන්තො නිරූපධි,
සබ්බාසවෙ පරිඤ්ඤාය විහරාමි අනාසවො.

5189. අට්ඨාරසෙ කප්පසතෙ යං කම්මමකරිං තදා,
දුග්ගතිං නාභිජානාමි තරණාය ඉදං ඵලං.

5190. කිලෙසා ඣාපිතා මය්හං භවා සබ්බෙ සමූහතා,
නාගො ව බන්ධනං ඡෙත්වා විහරාමි අනාසවො.

5191. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.