5135. නිබ්බුතෙ ලොකනාථම්හි සිද්ධත්ථෙ ලොකනායකෙ,
මම ඤාතී සමානෙත්වා ධාතුපූජං අකාසහං.

5136. චතුනවුතෙ ඉතො කප්පෙ යං ධාතුමභිපූජයිං,
දුග්ගතිං නාභිජානාමි ධාතුපූජායිදං ඵලං.

5137. කිලෙසා ඣාපිතා මය්හං භවා සබ්බෙ සමූහතා,
නාගො ව බන්ධනං ඡෙත්වා විහරාමි අනාසවො.

5138. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

5139. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

5140. පබ්බතෙ හිමවන්තම්හි දෙවළො නාම තාපසො,
තත්ථ මෙ චඞ්කමො ආසි අමනුස්සෙහි මාපිතො.

5141. ජටාභාරෙන භරිතො කමණ්ඩලුධරො තදා,
උත්තමත්ථං ගවෙසන්තො පවනා අභිනික්ඛමිං.

5142. චුල්ලාසීතිසහස්සානි සිස්සා මය්හං උපට්ඨහුං,
සකකම්මාභිපසුතා වසන්ති පවනෙ තදා.

5143. අස්සමා අභිනික්ඛම්ම අකං පුලිනචෙතියං,
නානාපුප්ඵං සමානෙත්වා තං චෙතියමපූජයිං.

5144. තත්ථ චිත්තං පසාදෙත්වා අස්සමං පවිසාමහං,
සබ්බෙ සිස්සා සමාගන්ත්වා එතමත්ථමපුච්ඡු මං.

5145. “පුලිනෙන කතෙ ථූපෙ යං ත්වං දෙවං නමස්සසි,
මයම්පි ඤාතුමිච්ඡාම පුට්ඨො ආචික්ඛ නො තුවං”

5146. නිද්දිට්ඨා නො මන්තපදෙ චක්ඛුමන්තො මහායස,
තෙ ඛො අහං නමස්සාමි බුද්ධසෙට්ඨෙ මහායසෙ.

5147. “කීදිසා තෙ මහාවීරා සබ්බඤ්ඤූ ලොකනායකා,
කථං වණ්ණා කථං සීලා කීදිසා තෙ මහායසා?”

5148. බත්තිංසලක්ඛණා බුද්ධා චත්තාරීසද්විජාපි ච,
නෙත්තා ගොපඛුමා තෙසං ජිඤ්ජුකාඵලසන්නිභා.

5149. ගච්ඡමානා ච තෙ බුද්ධා යුගමත්තංව පෙක්ඛරෙ,
න තෙසං ජාණු නදති සන්ධිසද්දො න සුය්යති.

5150. ගච්ඡමානා ච සුගතා උද්ධරන්තාව ගච්ඡරෙ,
පඨමං දක්ඛිණං පාදං බුද්ධානං එස ධම්මතා.

5151. අසම්හිතා ච තෙ බුද්ධා මිගරාජාව කෙසරී,
නෙවුකක්කංසෙන්ති අත්තානං නො ච වම්භෙන්ති පාණිනං.