4991. කස්සපස්ස භගවතො බ්රාහ්මණස්ස වුසීමතො,
පසන්නචිත්තො සුමනො කුසට්ඨකමදාසහං.

4992. ඉමස්මිං යෙව කප්පස්මිං කුසට්ඨකමදාසහං,
දුග්ගතිං නාභිජානාමි කුසට්ඨකස්සිදං ඵලං.

4993. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4994. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4995. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4996. සොභිතො නාම සම්බුද්ධො චිත්තකූටෙ වසී තදා,
ගහෙත්වා ගිරිපුන්නාගං සයම්භුම්හිපූජයිං.

4997. චතුනවුතෙ ඉතො කප්පෙ යං බුද්ධම්හිපූජයිං,
දුග්ගතිං නාභිජානාමි බුද්ධපූජායිදං ඵලං.

4998. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4999. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

5000. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

5001. සුමනො නාම සම්බුද්ධො තක්කරායං වසී තදා,
වල්ලිකාරඵලං ගය්හ සයම්භුස්ස අදාසහං.

5002. එකතිංසෙ ඉතො කප්පෙ යං ඵලං අදදිං තදා,
දුග්ගතිං නාභිජානාමි ඵලදානස්සිදං ඵලං.

5003. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

5004. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

5005. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

5006. අනොමදස්සී භගවා ලොකජෙට්ඨො නරාසභො,
දිවාවිහාරා නික්ඛම්ම පථමාරුහි චක්ඛුමා.

5007. පානධිං සුකතං ගය්හ අද්ධානං පටිපජ්ජහං,
තත්ථද්දසාසිං සම්බුද්ධං පත්තිකං චාරුදස්සනං.

5008. සකං චිත්තං පසාදෙත්වා නීහරිත්වාන පානධිං,
පාදමූලෙ ඨපෙත්වාන ඉදං වචනමබ්රවිං.

5009. අභිරූහ මහාවීර සුගතින්ද විනායක,
ඉතො ඵලං ලභිස්සාමි යො මෙ අත්ථො සමිජ්ඣතු.