4922. අජ්ඣොගහෙත්වා හිමවං මන්තෙ වාචෙමහං තදා,
චතුපඤ්ඤාසසහස්සානි සිස්සා මය්හං උපට්ඨහුං.

4923. අධීතා වෙදගූ සබ්බෙ ඡළඞ්ගෙ පාරමිඞ්ගතා,
සකවිජ්ජාහුපත්ථද්ධා හිමවන්තෙ වසන්ති තෙ.

4924. චවිත්වා තුසිතා කායා දෙවපුත්තො මහායසො,
උප්පජ්ජි මාතුකුච්ඡිස්මිං සම්පජානො පතිස්සතො.

4925. සම්බුද්ධෙ උපපජ්ජන්තෙ දසසහස්සී පකම්පථ,
අන්ධා චක්ඛුං අලභිංසු උප්පජ්ජන්තම්හි නායකෙ.

4926. සබ්බාකාරං පකම්පිත්ථ කෙවලා වසුධා අයං,
නිග්ඝොසසද්දං සුත්වාන උබ්බිජ්ජිංසු මහාජනා.

4927. සබ්බෙ ජනා සමාගම්ම ආගච්ඡුං මම සන්තිකං,
වසුධා’යං පකම්පිත්ථ කිංවිපාකො භවිස්සති.

4928. අවවාසිං තදා තෙසං ‘මා භෙථ නත්ථි වො භයං,
විස්සත්ථා හොථ සබ්බෙපි උප්පාදොයං සුවත්ථිකො.

4929. අට්ඨහෙතූහි සම්ඵුස්ස වසුධායං පකම්පති,
තථා නිමිත්තා දිස්සන්ති ඔභාසො විපුලො මහා.

4930. අසංසයං බුද්ධසෙට්ඨො උප්පජ්ජිස්සති චක්ඛුමා,
සඤ්ඤාපෙත්වාන ජනතං පඤ්චසීලෙ කථෙසහං.

4931. සුත්වාන පඤ්චසීලානි බුද්ධප්පාදඤ්ච දුල්ලභං,
උබ්බෙගජාතා සුමනා තුට්ඨහට්ඨා අහංසු තෙ.

4932. ද්වෙනවුතෙ ඉතො කප්පෙ යං නිමිත්තං වියාකරිං,
දුග්ගතිං නාභිජානාමි ව්යාකරණස්සිදං ඵලං.

4933. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4934. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4935. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

සාලකුසුමියො ථෙරො පූජානිබ්බාපකො පිච
සෙතුදො තාලවණ්ටී ච අවණ්ට ලබුජප්පදො
පිලක්ඛපටිභාණි ච වෙය්යාකරණියො දිජො
ද්වෙසත්තති ගාථායො ගණිතායො විභාවිහි

4936. සුවණ්ණවණ්ණං සම්බුද්ධං ආහුතීනං පටිග්ගහං,
පවනග්ගෙන ගච්ඡන්තං අද්දසං ලොකනායකං.

4937. නළමාලං ගහෙත්වාන නික්ඛමන්තොව තාවදෙ,
තත්ථද්දසාසිං සම්බුද්ධං ඔඝතිණ්ණමනාසවං.

4938. පසන්නචිත්තො සුමනො නළමාලං අපූජයිං,
දක්ඛිණෙය්යං මහාවීරං සබ්බලොකානුකම්පකං.

4939. එකතිංසෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

4940. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.