4689. හරීතකං ආමලකං අම්බජම්බු විභීතකං,
කොලං භල්ලාතකං බිල්ලං සයමෙවාහරාමහං.

4690. දිස්වාන පබ්භාරගතං ඣායිං ඣානරතං මුනිං,
ආබාධෙන පපීළෙන්තං අදුතියං මහාමුනිං.

4691. හරීතකං ගහෙත්වාන සයම්භුස්ස අදාසහං,
කතමත්තම්හි භෙසජ්ජෙ ව්යාධි පස්සම්හි තාවදෙ.

4692. පහීනදරථො බුද්ධො අනුමොදනියං අකා,
භෙසජ්ජදානෙනිමිනා ව්යාධිවූපසමෙන ච.

4693. දෙවභූතො මනුස්සො වා ජාතො වා අඤ්ඤජාතියා,
සබ්බත්ථ සුඛිතො හොහි මා ච තෙ ව්යාධි ආගමා.

4694. ඉදං වත්වාන සම්බුද්ධො සයම්භූ අපරාජිතො,
නභං අබ්භුග්ගමි ධීරො හංසරාජාව අම්බරෙ.

4695. යතො හරීටකමදං සයම්භුස්ස මහෙසිනො,
ඉමං ජාතිමුපාදාය ව්යාධි මෙ නුපපජ්ජථ.

4696. අයං පච්ඡිමකො මය්හං චරිමො වත්තතෙ භවො.
තිස්සො විජ්ජා සච්ඡිකතා කතං බුද්ධස්ස සාසනං.

4697. චතුනවුතෙ ඉතො කප්පෙ භෙසජ්ජමදදිං තදා,
දුග්ගතිං නාභිජානාමි භෙසජ්ජස්ස ඉදං ඵලං.

4698. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4699. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4700. පටිසම්භිදා චතස්සො ච විමොක්ඛා’පි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4701. හත්ථිරාජා තදා ආසිං ඊසාදන්තො උරූළ්හවා,
විචරන්තො බ්රහාරඤ්ඤෙ අද්දසං ලොකනායකං.

4702. අම්බපිණ්ඩිං ගහෙත්වාන අදාසිං සත්ථුනො අහං,
පටිගණ්හි මහාවීරො සිද්ධත්ථො ලොකනායකො.

4703. මම නිජ්ඣායමානස්ස පරිභුඤ්ජි තදා ජිනො,
තත්ථ චිත්තං පසාදෙත්වා තුසිතං උපපජ්ජහං.

4704. තතො අහං චවිත්වාන චක්කවත්තී අහොසහං,
එතෙනෙව උපායෙන අනුභොත්වාන සම්පදා.

4705. පධානපහිතත්තොහං උපසන්තො නිරූපධි,
සබ්බාසවෙ පරිඤ්ඤාය විහරාමි අනාසවො.

4706. චතුනවුතෙ ඉතො කප්පෙ යං ඵලං අදදිං තදා,
දුග්ගතිං නාභිජානාමි ඵලදානස්සිදං ඵලං.

4707. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.