4701. හත්ථිරාජා තදා ආසිං ඊසාදන්තො උරූළ්හවා,
විචරන්තො බ්රහාරඤ්ඤෙ අද්දසං ලොකනායකං.

4702. අම්බපිණ්ඩිං ගහෙත්වාන අදාසිං සත්ථුනො අහං,
පටිගණ්හි මහාවීරො සිද්ධත්ථො ලොකනායකො.

4703. මම නිජ්ඣායමානස්ස පරිභුඤ්ජි තදා ජිනො,
තත්ථ චිත්තං පසාදෙත්වා තුසිතං උපපජ්ජහං.

4704. තතො අහං චවිත්වාන චක්කවත්තී අහොසහං,
එතෙනෙව උපායෙන අනුභොත්වාන සම්පදා.

4705. පධානපහිතත්තොහං උපසන්තො නිරූපධි,
සබ්බාසවෙ පරිඤ්ඤාය විහරාමි අනාසවො.

4706. චතුනවුතෙ ඉතො කප්පෙ යං ඵලං අදදිං තදා,
දුග්ගතිං නාභිජානාමි ඵලදානස්සිදං ඵලං.

4707. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4708. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4709. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4710. පදුමුත්තරබුද්ධස්ස ලොකජෙට්ඨස්ස තාදිනො,
පිණ්ඩාය විචරන්තස්ස ධාරෙතො උත්තමං යසං.

4711. අග්ගඵලං ගහෙත්වාන විප්පසන්නෙන චෙතසා,
දක්ඛිණෙය්යස්ස වීරස්ස අදාසිං සත්ථුනො අහං.

4712. තෙන කම්මෙන දිපදින්ද ලොකජෙට්ඨ නරාසභ,
පත්තොම්හි අචලං ඨානං හිත්වා ජයපරාජයං.

4713. සතසහස්සෙ ඉතො කප්පෙ යං දානමදදිං තදා,
දුග්ගතිං නාභිජානාමි අග්ගදාදනස්සීදං ඵලං.

4714. කිලෙසා ඣාපිතා මය්හං භවා සබ්බෙ සමූහතා,
නාගො ච බන්ධනං ඡෙත්වා විහරාමි අනාසවො.

4715. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4716. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

ථෙරො එකවිහාරී ච සඞ්ඛිකො පාටිහීරකො,
ථවිකො උච්ඡුඛණ්ඩි ච කලම්බම්බාටකප්පදා,
හරීතකම්බපිණ්ඩී ච ජම්බුදො දසමො සති.
ඡළාසීති ච ගාථායො ගණිතායො විභාවීහි.