4642. විපස්සිනො භගවතො මහාබොධිමහො අහු,
මහාජනා සමාගම්ම පූජෙන්ති බොධිමුත්තමං.

4643. න හි තං ඔරකං මඤ්ඤෙ බුද්ධසෙට්ඨො භවිස්සති,
යස්සායමෙදිසො බොධි පූජනීයො ච සත්ථුනො.

4644. තතො සඞ්ඛං ගහෙත්වාන බොධිරුක්ඛං උපට්ඨහිං,
ධමෙන්තො සබ්බදිවසං අවන්දිං බොධිමුත්තමං.

4645. ආසන්නකෙ කතං කම්මං දෙවලොකං අපාපයී,
කළෙබරං මෙ පතිතං දෙවලොකෙ රමාමහං.

4646. සට්ඨිතුරියසහස්සානි තුට්ඨහට්ඨා පමොදිතා,
සදා මය්හං උපට්ඨන්ති බුද්ධපූජායිදං ඵලං.

4647. එකසත්තතිමෙ කප්පෙ රාජා ආසිං සුදස්සනො,
චාතුරන්තො විජිතාවී ජම්බුසණ්ඩස්ස ඉස්සරො.

4648. තතො අඞ්ගසතා තූරා පරිවාරෙන්ති මං සදා,
අනුභොමි සකං කම්මං උපට්ඨානස්සිදං ඵලං.

4649. යං යං යොනුපපජ්ජාමි දෙවත්තං අථ මානුසං,
මාතුකුච්ඡිගතස්සාපි වජ්ජරෙ භෙරියො සදා.

4650. උපට්ඨහිත්වා සම්බුද්ධං අනුභොත්වාන සම්පදා,
සිවං සුඛෙමං අමතං පත්තොම්හි අචලං පදං.

4651. එකනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි බුද්ධපූජායිදං ඵලං.

4652. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4653. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4654. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4655. පදුමුත්තරො නාම ජිනො ආහුතීනං පටිග්ගහො,
වසීසතසහස්සෙහි නගරං පාවිසී තදා.

4656. නගරං පවිසන්තස්ස උපසන්තස්ස තාදිනො,
රතනානි පජ්ජොතිංසු නිග්ඝොසො ආසි තාවදෙ.

4657. බුද්ධස්ස අනුභාවෙන භෙරී වජ්ජුමඝට්ටිතා,
සයං වීණා පවජ්ජන්ති බුද්ධස්ස විසතො පුරං.

4658. බුද්ධසෙට්ඨං න පස්සාමි පදුමුත්තරං මහාමුනිං,
පාටිහීරං ච පස්සිත්වා තත්ථ චිත්තං පසාදයිං.

4659. අහො බුද්ධො අහො ධම්මො අහො නො සත්ථූසම්පදා.
අචෙතනාපි තුරියා සයමෙව පවජ්ජරෙ.

4660. සතසහස්සෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි බුද්ධසඤ්ඤායිදං ඵලං.

4661. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහාරාමි අනාසවො.

4662. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4663. පටිසම්භිදා චතස්සො ච විමොක්ඛොපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.