4655. පදුමුත්තරො නාම ජිනො ආහුතීනං පටිග්ගහො,
වසීසතසහස්සෙහි නගරං පාවිසී තදා.

4656. නගරං පවිසන්තස්ස උපසන්තස්ස තාදිනො,
රතනානි පජ්ජොතිංසු නිග්ඝොසො ආසි තාවදෙ.

4657. බුද්ධස්ස අනුභාවෙන භෙරී වජ්ජුමඝට්ටිතා,
සයං වීණා පවජ්ජන්ති බුද්ධස්ස විසතො පුරං.

4658. බුද්ධසෙට්ඨං න පස්සාමි පදුමුත්තරං මහාමුනිං,
පාටිහීරං ච පස්සිත්වා තත්ථ චිත්තං පසාදයිං.

4659. අහො බුද්ධො අහො ධම්මො අහො නො සත්ථූසම්පදා.
අචෙතනාපි තුරියා සයමෙව පවජ්ජරෙ.

4660. සතසහස්සෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි බුද්ධසඤ්ඤායිදං ඵලං.

4661. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහාරාමි අනාසවො.

4662. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4663. පටිසම්භිදා චතස්සො ච විමොක්ඛොපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4664. කණිකාරංව ජලිතං දීපරුක්ඛංව ජොතිතං,
කඤ්චනංව විරොචන්තං අද්දසං දිපදුත්තමං.

4665. කමණ්ඩලුං ඨපෙත්වාන වාකචීරං ච කුණ්ඩිකං,
එකංසං අජිනං කත්වා බුද්ධසෙට්ඨං ථවිං අහං.

4666. තමන්ධකාරං විධමං මොහජාලසමාකුලං,
ඤාණාලොකං දස්සයිත්වා නිත්තිණ්ණොසි මහාමුනි.

4667. සමුද්ධරසිමං ලොකං සබ්බාවන්තමනුත්තර,
ඤාණෙ තෙ උපමා නත්ථි යාවතා ජගතො ගති.

4668. තෙන ඤාණෙන සබ්බඤ්ඤූ ඉති බුද්ධො පවුච්චති,
වන්දාමි තං මහාවීර සබ්බඤ්ඤුතමනාවරං.

4669. සතසහස්සෙ ඉතො කප්පෙ බුද්ධසෙට්ඨං ථවිං අහං,
දුග්ගතිං නාභිජානාමි ඤාණත්ථවායිදං ඵලං.

4670. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4671. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4672. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4673. නගරෙ බන්ධුමතියා ද්වාරපාලො අහොසහං,
අද්දසං විරජං බුද්ධං සබ්බධම්මාන පාරගුං.

4674. උච්ඡුඛණ්ඩකමාදාය බුද්ධසෙට්ඨස්සදාසහං,
පසන්නචිත්තො සුමනො විපස්සිස්ස මහෙසිනො.

4675. එකනවුතෙ ඉතො කප්පෙ යං උච්ඡුමදදිං තදා,
දුග්ගතිං නාභාජානාමි උච්ඡුඛණ්ඩස්සිදං ඵලං.