4630. ඉමම්හි භද්දකෙ කප්පෙ බ්රහ්මබන්ධු මහායසො,
කස්සපො නාම ගොත්තෙන උප්පජ්ජි වදතං වරො.

4631. නිප්පපඤ්චො නිරාලම්බො ආකාසසමමානසො,
සුඤ්ඤතාබහුලො තාදී අනිමිත්තරතො වසී.

4632. අසඞ්ගචිත්තො නික්ලෙසො අසංසට්ඨො කුලෙ ගණෙ,
මහාකාරුණිකො වීරො විනයොපායකොවිදො.

4633. උය්යුත්තො පරකිච්චෙසු විනයන්තො සදෙවකෙ,
නිබ්බානගමනං මග්ගං ගතිපඞ්කවිසොසනං.

4634. අමතං පරමස්සාදං ජරාමච්චුනිවාරණං,
මහාපරිසමජ්ඣෙ සො නිසින්නො ලොකතාරණො.

4635. කරවීකරුතො නාථො බ්රහ්මඝොසො තථාගතො,
උද්ධරන්තො මහාදුග්ගා විපන්නද්ධෙ අනායකෙ,

4636. දෙසෙන්තො විරජං ධම්මං දිට්ඨො මෙ ලොකනායකො,
තස්ස ධම්මං සුණිත්වාන පබ්බජිං අනගාරියං.

4637. පබ්බජිත්වා තදා චාහං චින්තෙන්තො ජිනසාසනං,
එකකොව වනෙ රම්මෙ වසිං සංසග්ගපීළිතො.

4638. සකායවුපකස්සො මෙ හෙතුභුතො මහාභවි,
මනසො වූපකස්සස්ස සංසග්ගභයදස්සිනො.

4639. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4640. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4641. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4642. විපස්සිනො භගවතො මහාබොධිමහො අහු,
මහාජනා සමාගම්ම පූජෙන්ති බොධිමුත්තමං.

4643. න හි තං ඔරකං මඤ්ඤෙ බුද්ධසෙට්ඨො භවිස්සති,
යස්සායමෙදිසො බොධි පූජනීයො ච සත්ථුනො.

4644. තතො සඞ්ඛං ගහෙත්වාන බොධිරුක්ඛං උපට්ඨහිං,
ධමෙන්තො සබ්බදිවසං අවන්දිං බොධිමුත්තමං.

4645. ආසන්නකෙ කතං කම්මං දෙවලොකං අපාපයී,
කළෙබරං මෙ පතිතං දෙවලොකෙ රමාමහං.

4646. සට්ඨිතුරියසහස්සානි තුට්ඨහට්ඨා පමොදිතා,
සදා මය්හං උපට්ඨන්ති බුද්ධපූජායිදං ඵලං.

4647. එකසත්තතිමෙ කප්පෙ රාජා ආසිං සුදස්සනො,
චාතුරන්තො විජිතාවී ජම්බුසණ්ඩස්ස ඉස්සරො.

4648. තතො අඞ්ගසතා තූරා පරිවාරෙන්ති මං සදා,
අනුභොමි සකං කම්මං උපට්ඨානස්සිදං ඵලං.

4649. යං යං යොනුපපජ්ජාමි දෙවත්තං අථ මානුසං,
මාතුකුච්ඡිගතස්සාපි වජ්ජරෙ භෙරියො සදා.

4650. උපට්ඨහිත්වා සම්බුද්ධං අනුභොත්වාන සම්පදා,
සිවං සුඛෙමං අමතං පත්තොම්හි අචලං පදං.

4651. එකනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි බුද්ධපූජායිදං ඵලං.

4652. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.