4548. පදුමුත්තරො නාම ජිනො සබ්බධම්මානපාරගූ,
චතුසච්චං පකාසෙන්තො සන්තාරෙසි බහුං ජනං.

4549. අහං තෙන සමයෙන ජටිලො උග්ගතාපනො,
ධුනන්තො වාකචීරානි ගච්ඡාමි අම්බරෙ තදා.

4550. බුද්ධසෙට්ඨස්ස උපරි ගන්තුං න විසහාමහං,
පක්ඛීව සෙලමාසජ්ජ ගමනං න ලභාමහං.

4551. උදකෙ’වොක්කමිත්වාන එවං ගච්ඡාමි අම්බරෙ,
න මෙ ඉදං භූතපුබ්බං ඉරියාපථවිකොපානං.

4552. හන්දමෙතං ගවෙසිස්සං අප්පෙව’ත්ථං ලභෙය්යහං,
ඔරොහන්තො අන්තලික්ඛා සද්දමස්සොසි සත්ථුනො.

4553. සරෙන රජනීයෙන සවණීයෙන වග්ගුනා,
අනිච්චතං කථෙන්තස්ස තඤ්ඤෙව උග්ගහිං තදා.

4554. අනිච්චසඤ්ඤං උග්ගය්හ අගමාසිං මමස්සමං,
යාවතායුං වසිත්වාන තත්ථ කාලකතො අහං.

4555. චරිමෙ වත්තමානම්හි සද්ධම්මමසවණං සරිං,
තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

4556. තිංසකප්පසහස්සානි දෙවලොකෙ රමිං අහං,
එකපඤ්ඤාසක්ඛත්තුඤ්ච දෙවරජ්ජමකාරයිං.

4557. එකවීසතික්ඛත්තුඤ්ච චක්කවත්තී අහොසහං,
පදෙසරජ්ජං විපුලං ගණනාතො අසංඛියං.

4558. අනුභොසිං සකං පුඤ්ඤං සුඛිතොහං භවාභවෙ,
අනුස්සරාමි තං සඤ්ඤං සංසරන්තො භවාභවෙ,
න කොටිං පටිවිජ්ඣාමි නිබ්බානං අච්චුතං පදං.

4559. පිතු ගෙහෙ නිසීදිත්වා සමණො භාවිතින්ද්රියො,
කථයං පරිදීපෙන්තො අනිච්චතමුදාහරි.

4560. අනිච්චා වත සංඛාරා උප්පාදවයධම්මිනො,
උප්පජ්ජිත්වා නිරුජ්ඣන්ති තෙසං වූපසමො සුඛො.

4561. සහ ගාථං සුණිත්වාන පුබ්බසඤ්ඤමනුස්සරිං,
එකාසනෙ නිසීදිත්වා අරහත්තමපාපුණිං.

4562. ජාතියා සත්තවස්සෙන අරහත්තමපාපුණිං,
උපසම්පාදයී බුද්ධො ධම්මසවණස්සිදං ඵලං.

4563. සතසහස්සෙ ඉතො කප්පෙ යං ධම්මමසුණිං තදා,
දුග්ගතිං නාභිජානාමි ධම්මසවණස්සිදං ඵලං.

4564. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4565. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.