4567. නගරෙ හංසවතියා අහොසිං කස්සකො තදා,
කසිකම්මෙන ජීවාමි තෙන පොසෙමි දාරකෙ.

4568. සුසම්පන්නං තදා ඛෙත්තං ධඤ්ඤං මෙ ඵලිතං අහු,
පාකකාලෙ ච සම්පත්තෙ එවං චින්තෙසහං තදා.

4569. නච්ඡන්නං නප්පතිරූපං ජානන්තස්ස ගුණාගුණං,
යො’හං සඞ්ඝෙ අදත්වාන අග්ගං භුඤ්ජෙය්ය චෙ තදා.

4570. අයං බුද්ධො අසමසමො ද්වත්තිංසවරලක්ඛණො,
තතො පභාවිතො සඞ්ඝො පුඤ්ඤක්ඛෙත්තො අනුත්තරො.

4571. තත්ථ දස්සාමහං දානං නවසස්සං පුරෙ පුරෙ,
එවාහං චින්තයිත්වාන හට්ඨො පීණිතමානසො.

4572. ඛෙත්තතො ධඤ්ඤමාහත්වා සම්බුද්ධමුපසඞ්කමිං,
උපසඞ්කම්ම සමුබුද්ධං ලොකජෙට්ඨං නරාසභං,
වන්දිත්වා සත්ථුනො පාදෙ ඉමං වචනමබ්රවිං.

4573. නවසස්සං ච සම්පන්නං ආයාගො පි ච ත්වං මුනෙ,
අනුකම්පමුපාදාය අධිවාසෙහි චක්ඛුම.

4574. පදුමුත්තරො ලොකවිදූ ආහුතීනං පටිග්ගහො,
මම සඞ්කප්පමඤ්ඤාය ඉමං වචනමබ්රවි.

4575. “චත්තාරො ච පටිපන්නා චත්තාරො ච ඵලෙ ඨිතා,
එස සඞ්ඝො උජුභූතො පඤ්ඤාසීලසමාහිතො.

4576. යජන්තානං මනුස්සානං පුඤ්ඤපෙක්ඛානපාණිනං,
කරොතොපධිකං පුඤ්ඤං සඞ්ඝෙ දින්නං මහප්ඵලං.

4577. තස්මිං සඞ්ඝෙ පදාතබ්බං නවසස්සං තථෙතරං,
සඞ්ඝතො උද්දිසිත්වාන භික්ඛූ නෙත්වාන සංඝරං,
පටියත්තං ඝරෙ යන්තං භික්ඛුසඞ්ඝස්ස දෙහි ත්වං.”

4578. සඞ්ඝතො උද්දිසිත්වාන භික්ඛු නෙත්වානහං ඝරං,
යං ඝරෙ පටියත්තං මෙ භික්ඛුසඞ්ඝස්සදාසහං.

4579. තෙන කම්මෙන සුකතෙන චෙතනා පණිධීහි ච,
ජහිත්වා මානුසං දෙහං තාවතිංසමගච්ඡහං.

4580. තත්ථ මෙ සුකතං ව්යම්හං සොවණ්ණං සප්පභස්සරං,
සට්ඨියොජනමුබ්බෙධං තිංසයොජනවිත්ථතං.

4581. ආකිණ්ණං භවනං මය්හං නාරීගණසමාකුලං,
තත්ථ භුත්වා පිවිත්වා ච වසාමි තිදසෙ අහං.

4582. සතානං තීණික්ඛත්තුං ච දෙවරජ්ජමකාරයිං,
සතානං පඤ්චක්ඛත්තුං ච චක්කවත්තී අහොසහං,
පදෙසරජ්ජං විපුලං ගණනාතො අසඞ්ඛියං.

4583. භවාභවෙ සංසරන්තො ලභාමි අමිතං ධනං,
භොගෙ මෙ ඌනතා නත්ථි නවසස්සස්සිදං ඵලං.

4584. හත්ථියානං අස්සයානං සිවිකං සන්දමානිකං,
ලභාමි සබ්බමෙවෙතං නවසස්සස්සිදං ඵලං.

4585. නවවත්ථං නවඵලං නවග්ගරසභොජනං,
ලභාමි සබ්බමෙවෙතං නවසස්සස්සිදං ඵලං.

4586. කොසෙය්යකම්බලියානි ඛොමකප්පාසිකානි ච,
ලභාමි සබ්බමෙවෙතං නවසස්සස්සිදං ඵලං.

4587. දාසීගණං දාසගණං නාරියො ච අලඞ්කතා,
ලභාමි සබ්බමෙවෙතං නවසස්සස්සිදං ඵලං.

4588. න මං සීතං වා උණ්හං වා පරිළාහො න විජ්ජති,
අථො චෙතසිකං දුක්ඛං හදයෙ මෙ න විජ්ජති.

4589. ඉමං ඛාද ඉමං භුඤ්ජ ඉමම්හි සයනෙ සය,
ලභාමි සබ්බමෙවෙතං නවසස්සස්සිදං ඵලං.