4476. නගරෙ හංසවතියා අහොසිං තිණහාරකො,
තිණහාරෙන ජීවාමි තෙන පොසෙමි දාරකෙ.

4477. පදුමුත්තරො නාම ජිනො සබ්බධම්මානපාරගූ,
තමන්ධකාරං නාසෙත්වා උප්පජ්ජි ලොකනායකො.

4478. සකෙ ඝරෙ නිසීදිත්වා එවං චිත්තෙසි තාවදෙ,
බුද්ධො ලොකෙ සමුප්පන්නො දෙය්යධම්මො න විජ්ජති.

4479. ඉදං මෙ සාටකං එකං නත්ථි මෙ කොචි දායකො,
දුක්ඛො නිරයසම්ඵස්සො රොපයිස්සාමි දක්ඛිණං.

4480. එවාහං චින්තයිත්වාන සකං චිත්තං පසාදයිං,
එකං දුස්සං ගහෙත්වාන බුද්ධසෙට්ඨස්සදාසහං.

4481. එකදුස්සං දදිත්වාන උක්කුට්ඨිං සම්පවත්තයිං,
යදි බුද්ධො ත්වං වීර තාරෙහි මං මහාමුනි.

4482. පදුමුත්තරො ලොකවිදූ ආහුතීනං පටිග්ගහො,
මම දානං පකිත්තෙන්තො අකා මෙ අනුමොදනං:

4483. “ඉමිනා එකදුස්සෙන චෙතනාපණිධීහි ච,
කප්පසතසහස්සානි විනිපාතං න ගච්ඡසි.

4484. ඡත්තිංසක්ඛත්තුං දෙවින්දො දෙවරජ්ජං කරිස්සසි,
තෙත්තිංසක්ඛත්තුං රාජා ච චක්කවත්තී භවිස්සසි.

4485. පදෙසරජ්ජං විපුලං ගණනාතො අසඞ්ඛියං,
දෙවලොකෙ මනුස්සෙ වා සංසරන්තො තුවං භවෙ.

4486. රූපවා ගුණසම්පන්නො අනවක්කන්තදෙහවා,
අක්ඛොභං අමිතං දුස්සං ලභිස්සසි යදිච්ඡකං.”

4487. ඉදං වත්වාන සම්බුද්ධො ජලජුත්තමනායකො,
නභං අබ්භුග්ගමී ධීරො හංසරාජා’ව අම්බරෙ.

4488. යං යං යොනුපපජ්ජාමි දෙවත්තං අථ මානුසං,
භොගෙ මෙ ඌනතා නත්ථි එකදුස්සස්සිදං ඵලං.

4489. පදුද්ධාරෙ පදුද්ධාරෙ දුස්සං නිබ්බත්තතෙ මම,
හෙට්ඨා දුස්සම්හි තිට්ඨාමි උපරිච්ඡදනං මම.

4490. චක්කවාළමුපාදාය සකානනං සපබ්බතං,
ඉච්ඡමානො චහං අජ්ජ දුස්සෙහච්ඡාදයෙය්ය තං.

4491. තෙනෙව එකදුස්සෙන සංසරන්තො භවාභවෙ,
සුවණ්ණවණ්ණො හුත්වාන සංසරාමි භවාභවෙ.