4497. හිමවන්තස්ස අවිදූරෙ ගොසිතො නාම පබ්බතො,
අස්සමො සුකතො මය්හං පණ්ණසාලා සුමාපිතා.

4498. නාරදො ඉති නාමෙන කස්සපො ඉති මං විදූ,
සුද්ධිමග්ගං ගවෙසන්තො වසාමි ගොසිතෙ තදා.

4499. පදුමුත්තරො නාම ජිනො සබ්බධම්මානපාරගූ,
විවෙකකාමො සම්බුද්ධො ආගච්ඡි අනිලඤ්ජසා.

4500. වනග්ගෙ ගච්ඡමානස්ස දිස්වා රංසිං මහෙසිනො,
කට්ඨමඤ්චං පඤ්ඤපෙත්වා අජිනඤ්ච අපත්ථරිං.

4501. ආසනං පඤ්ඤපෙත්වාන සිරෙ කත්වාන අඤ්ජලිං,
සොමනස්සං පවෙදෙත්වා ඉදං වචනමබ්රවිං:

4502. සල්ලකත්තො මහාවීර ආතුරානං තිකිච්ඡකො,
මමං රොගපරෙතස්ස තිකිච්ඡං දෙහි නායක.

4503. කල්ලත්ථිකා යෙ පස්සන්ති බුද්ධසෙට්ඨ තුවං මුනෙ,
ධුවත්ථසිද්ධිං පප්පොන්ති එතෙසං ජජ්ජරො භවො.

4504. න මෙ දෙය්යං තව අත්ථි පවත්තඵලභොජි’හං,
ඉදං මෙ ආසනං අත්ථි නිසීදි කට්ඨමඤ්චකෙ.

4505. නිසීදි තත්ථ භගවා අසම්භීතො’ව කෙසරී,
මුහුත්තං වීතිනාමෙත්වා ඉදං වචනමබ්රවී:

4506. “විස්සත්ථො හොහි මා භායී ලද්ධො ජොතිරසො තයා,
යං තුය්හං පත්ථිතං සබ්බං පරිපූරිස්සතනාගතෙ.

4507. න මොඝං තං කතං තුය්හං පුඤ්ඤක්ඛෙත්තෙ අනුත්තරෙ,
සක්කා උද්ධරිතුං අත්තා යස්ස චිත්තං පණීහිතං.

4508. ඉමිනාසනදානෙන චෙතනාපණිධීහි ච,
කප්පසතසහස්සානි විනිපාතං න ගච්ඡසි.

4509. පඤ්ඤාසක්ඛත්තුං දෙවින්දො දෙවරජ්ජං කරිස්සසි,
අසීතික්ඛත්තුං රාජා ච චක්කවත්තී භවිස්සසි.

4510. පදෙසරජ්ජං විපුලං ගණනාතො අසඞ්ඛියං,
සබ්බත්ථ සුඛිතො හුත්වා සංසාරෙ සංසරිස්සසි.”

4511. ඉදං වත්වාන සම්බුද්ධො ජලජුත්තමනායකො,
නභං අබ්භුග්ගමී ධීරො හංසරාජාව අම්බරෙ.

4512. හත්ථියානං අස්සයානං සරථං සන්දමානිකං,
ලභාමි සබ්බමෙවෙතං එකාසනස්සිදං ඵලං.

4513. කානනං පවිසිත්වාපි යදා ඉච්ඡාමි ආසනං,
මම සඞ්කප්පමඤ්ඤාය පල්ලඞ්කො උපතිට්ඨති.

4514. වාරිමජ්ඣගතො සන්තො යදා ඉච්ඡාමි ආසනං,
මම සඞ්කප්පමඤ්ඤාය පල්ලඞ්කො උපතිට්ඨති.

4515. යං යං යොනුපපජ්ජාමි දෙවත්තං අථ මානුසං,
පල්ලඞ්කසතසහස්සානි පරිවාරෙන්ති මං සදා.

4516. දුවෙ භවෙ සංසරාමි දෙවත්තෙ අථ මානුසෙ,
දුවෙ කුලෙ පජායාමි ඛත්තියෙ අථ බ්රාහ්මණෙ.

4517. එකාසනං දදිත්වාන පුඤ්ඤක්ඛෙත්තෙ අනුත්තරෙ,
ධම්මපල්ලඞ්කමාදාය විහරාමි අනාසවො.

4518. සතසහස්සෙ ඉතො කප්පෙ යං දානමදදිං තදා,
දුග්ගතිං නාභිජානාමි එකාසනස්සිදං ඵලං.