4409. නගරෙ බන්ධුමතියා අහොසිං මාලිකො තදා,
උච්ඡඞ්ගං පූරයිත්වාන අගමං අන්තරාපණං.

4410. භගවා තම්හි සමයෙ භික්ඛුසඞ්ඝපුරක්ඛතො,
මහතා අනුභාවෙන නිය්යාති ලොකනායකො.

4411. දිස්වාන ලොකපජ්ජොතං විපස්සිං ලොකතාරණං,
පුප්ඵං පග්ගය්හ උච්ඡඞ්ගා බුද්ධසෙට්ඨං අපූජයිං.

4412. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

4413. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4414. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4415. පටිසම්භිදා චතස්සො විමොක්ඛො පි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4416. අතිථිං මෙ ගහෙත්වාන අගච්ඡිං ගාමකං තදා,
සම්පුණ්ණනදිකං දිස්වා සඞ්ඝාරාම මුපාගමිං.

4417. ආරඤ්ඤකා ධුතධරා ඣායිනො ලූඛචීවරා,
විවෙකාභිරතා ධීරා සඞ්ඝරාමෙ වසන්ති තෙ.

4418. ගතී තෙසං උපච්ඡින්නා සුවිමුත්තාන තාදිනං,
පිණ්ඩාය තෙ න ගච්ඡන්ති ඔරුද්ධනදිතාය හි.

4419. පසන්නචිත්තො සුමනො වෙදජාතො කතඤ්ජලී,
තණ්ඩුලං මෙ ගහෙත්වාන යාගුදානමදාසහං.

4420. පඤ්චන්නං යාගුං දත්වාන පසන්නො සෙහි පාණිහි,
සකකම්මාභිරද්ධො’හං තාවතිසංසමගච්ඡහං.

4421. මණිමයඤ්ච මෙ ව්යම්හං නිබ්බත්ති තිදසෙ ගණෙ,
නාරීගණෙහි සහිතො මොදාමි ව්යම්හමුත්තමෙ.

4422. තෙත්තිංසක්ඛත්තුං දෙවින්දො දෙවරජ්ජමකාරයිං,
තිංසක්ඛත්තුං චක්කවත්තීමහාරජ්ජමකාරයිං.

4423. පදෙසරජ්ජං විපුලං ගණනාතො අසංඛියං,
දෙවලොකෙ මනුස්සෙ වා අනුභොත්වා යසං අහං.

4424. පච්ඡිමභවෙ සම්පත්තෙ පබ්බජිං අනගාරියං,
සහ ඔරොපිතෙ කෙසෙ සබ්බං සම්පටිවිජ්ඣහං.

4425. ඛයතො වයතො වා පි සම්මසන්තො කලෙබරං,
පුරෙ සික්ඛාපදා දානා අරහත්ත මපාපුණිං.

4426. සුදින්නං මෙ දානවරං වාණිජ්ජං සුප්පයොජිතං,
තෙනෙව යාගුදානෙන පත්තො’ම්හි අචලං පදං.

4427. සොකං පරිද්දවං ව්යාධිං දරථං චිත්තතාපනං,
නාභිජානාමි උප්පන්නං යාගුදානස්සිදං ඵලං.

4428. යාගුං සඞ්ඝස්ස දත්වාන පුඤ්ඤක්ඛෙත්තෙ අනුත්තරෙ,
පඤ්චානිසංසෙ අනුභොමි අහො යාගු සුයිට්ඨතා.

4429. අව්යාධිතා රූපවතා ඛිප්පං ධම්මනිසන්තිතා,
ලාභිතා අන්නපානස්ස ආයු පඤ්චමකං මම.