4385. නගරෙ බන්ධුමතියා රාජුය්යානෙ වසාමහං,
මම අස්සමසාමන්තා නිසීදි ලොකනායකො.

4386. නාගපල්ලවමාදාය බුද්ධස්ස අභිරොපයිං,
පසන්නචිත්තො සුමනො සුගතං අභිවාදයිං.

4387. එකනවුතෙ ඉතො කප්පෙ යං පල්ලවමපූජයිං,
දුග්ගතිං නාභිජානාමි බුද්ධපූජායිදං ඵලං.

4388. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4389. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සෙ විජ්ජා අනුප්පත්තා කතං බුද්ධස්ස සාසනං.

4390. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4391. පරිනිබ්බුතම්හි සුගතෙ සිද්ධත්ථෙ ලොකනායකෙ,
සදෙවමානුසා සබ්බෙ පූජෙන්ති දිපදුත්තමං.

4392. ආරොපිතෙ ච චිතකෙ සිද්ධත්ථෙ ලොකනායකෙ,
යථාසකෙන ථාමෙන චිතං පූජෙන්ති සත්ථුනො.

4393. අවිදූරෙ චිතකස්ස දීපමුජ්ජාලයිං අහං,
යාව උදෙති සුරියො දීපං මෙ තාව උජ්ජලි.

4394. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

4395. තත්ථ මෙ සුකතං ව්යම්හං එකදීපිති ඤායති,
දීපසතසහස්සානි ව්යම්හෙ පජ්ජලරෙ මම.

4396. උදයන්තොව සුරියො දෙහො මෙ ජොතතෙ සදා,
සබ්බභාහි සරීරස්ස ආලොකො හොති මෙ සදා.

4397. තිරොකුඩ්ඩං තිරොසෙලං සසමතිග්ගය්හං පබ්බතං,
සමන්තා යොජනසතං පස්සාමි චක්ඛුනා අහං.

4398. සත්තසත්තතික්ඛත්තුඤ්ච දෙවලොකෙ රමිං අහං,
එකතිංසතික්ඛත්තුඤ්ච දෙවරජ්ජමකාරයිං.

4399. අට්ඨිවීසතික්ඛත්තුඤ්ච චක්කවත්තී අහොසහං,
පදෙසරජ්ජං විපුලං ගණනාතො අසංඛියං.

4400. දෙවලොකා චවිත්වාන නිබ්බත්තිං මාතුකුච්ඡියං,
මාතුකුච්ඡිගතස්සාපි අක්ඛි මෙ න නිමීලති.

4401. ජාතියා චතුවස්සොහං පබ්බජිං අනගාරියං,
අඩ්ඪමාසෙ අසම්පත්තෙ අරහත්තමපාපුණිං.