4373. නගරෙ බන්ධුමතියා සූකරිකො අහොසහං,
උක්කොටකං රන්ධයිත්වා මධු මංසම්හි ඔකිරිං.

4374. සන්නිපාතං අහං ගන්ත්වා එකං පත්තං ගහෙසහං,
පූරයිත්වාන තං පත්තං භික්ඛුසඞ්ඝස්ස’දාසහං.

4375. යො’ත්ථ ථෙරතරො භික්ඛු නිය්යාදෙසි මමං තදා,
ඉමිනා පත්තපූරෙන ලභස්සු විපුලං සුඛං.

4376. ද්වෙසම්පත්තියො භුත්වා සුක්කමූලෙන චොදිතො,
පච්ඡිමෙ වත්තමානම්හි කිලෙසෙ ඣාපයිස්සති.

4377. තත්ථ චිත්තං පසාදෙත්වා තාවතිංසං අගච්ඡහං,
තත්ථ භුත්වා පිවිත්වා ච ලභාමි විපුලං සුඛං.

4378. මණ්ඩපෙ රුක්ඛමූලෙ වා පුබ්බකම්මං අනුස්සරිං,
අන්නපානාභිවස්සො මෙ අභිවස්සති තාවදෙ.

4379. ඉදං පච්ඡිමකං මය්හං චරිමො වත්තතෙ භවො,
ඉධාපි අන්නපානං මෙ වස්සතෙ සබ්බකාලිකං.

4380. තෙනෙව මංසදානෙන සන්ධාවිත්වා භවෙ අහං,
සබ්බාසවෙ පරිඤ්ඤාය විහරාමි අනාසවො.

4381. එකනවුතෙ ඉතො කප්පෙ යං දානමදදිං තදා,
දුග්ගතිං නාභිජානාමි මධුදානස්සිදං ඵලං.

4382. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4383. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4384. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4385. නගරෙ බන්ධුමතියා රාජුය්යානෙ වසාමහං,
මම අස්සමසාමන්තා නිසීදි ලොකනායකො.

4386. නාගපල්ලවමාදාය බුද්ධස්ස අභිරොපයිං,
පසන්නචිත්තො සුමනො සුගතං අභිවාදයිං.

4387. එකනවුතෙ ඉතො කප්පෙ යං පල්ලවමපූජයිං,
දුග්ගතිං නාභිජානාමි බුද්ධපූජායිදං ඵලං.