4165. නගරෙ හංසවතියා සෙට්ඨිපුත්තො අහොසහං,
සමප්පිතො කාමගුණෙ පරිවාරෙමහං තදා.

4166. තයො පාසාදමාරුය්හ උබ්බිද්ධා ගෙහලඤ්ඡකා
තත්ථ නච්චෙහි ගීතෙහි පරිවාරෙමහං තදා.

4167. තුරියා ආහතා මය්හං සම්මතාලසමාහිතා,
නච්චන්තා ඉත්ථියො සබ්බා හරන්ති යෙව මෙ මනො.

4168. වෙලාපිකා ලාමණිකා කුඤ්ජවාසී තිමජ්ඣිකා
ලඞ්ඝිකා සොකජ්ඣායීච පරිවාරෙන්ති මං සදා.

4169. වෙතාලිනො කුම්භථූනී නටා ච නච්චකා බහූ,
නටකා නාටකා චෙව පරිවාරෙන්ති මං සදා.

4170. කප්පකා නහාපකා සූදා මාලාකාරා සුමාපකා,
ජල්ලා මල්ලාති සබ්බෙව පරිවාරෙන්ති මං සදා.

4171. එතෙසු කීළමානෙසු සික්ඛිතෙ කතුපාසනෙ,
රත්තින්දිවං න ජානාමි ඉන්දොව තිදසඞ්ගණෙ.

4172. අද්ධිකා පථිකා සබ්බෙ යාචකා චරකා බහූ,
උපගච්ඡන්ති තෙ නිච්චං භික්ඛයන්තා මමං ඝරං.

4173. සමණා බ්රාහ්මණා චෙව පුඤ්ඤක්ඛෙත්තා අනුත්තරා,
වඩ්ඪයන්තා මමං පුඤ්ඤං ආගච්ඡන්ති මමං ඝරං.

4174. පටකා ලටකා සබ්බෙ නිගණ්ඨා පුප්ඵසාටකා,
තෙදණ්ඩිකා එකසිඛා ආගච්ඡන්ති මමං ඝරං.

4175. ආජීවකා විලුත්තාවී ගොධම්මා දෙවධම්මිකා,
රජොජල්ලධරා එතෙ ආගච්ඡන්ති මමං ඝරං.

4176. පරිවත්තකා සිද්ධිපත්තා කොණ්ඩපුග්ගණිකා බහූ,
තපස්සී වනචාරී ච ආගච්ඡන්ති මමං ඝරං.

4177. ඔඩ්ඩකා දමිළා චෙව සාකුලා මලයාලකා,
සබරා යොනකා චෙව ආගච්ඡන්ති මමං ඝරං.

4178. අන්ධකා මුණ්ඩකා සබ්බෙ කොලකා සානුවින්දකා,
ආරාවචීනරට්ඨා ච ආගච්ඡන්ති මමං ඝරං.

4179. අලසන්දකා පල්ලවකා බබ්බරා භග්ගකාරුසා,
රොහිතා චෙතපුත්තා ච ආගච්ඡන්ති මමං ඝරං.

4180. මාධුරකා කොසලකා කාසිකා හත්ථිපොරිකා,
ඉසිණ්ඩා මක්කලා චෙව ආගච්ඡන්ති මමං ඝරං.

4181. චෙලාවකා අරම්මා ච ඔක්කලා මෙඝලා බහූ,
ඛුද්දකා සුද්දකා චෙව ආගච්ඡන්ති මමං ඝරං.

4182. රොහණා සින්ධවා චෙව චිතකා එකකණ්ණිකා,
සුරට්ඨා අපරන්තා ච ආගච්ඡන්ති මමං ඝරං.

4183. සුප්පාරකා කිකුමාරා මලයා සොණ්ණභූමිකා,
වජ්ජී තාරා ච තෙ සබ්බෙ ආගච්ඡන්ති මමං ඝරං.

4184. නළකාරා පෙසකාරා චම්මකාරා ච තච්ඡකා,
කම්මාරා කුම්භකාරා ච ආගච්ඡන්ති මමං ඝරං.

4185. මණිකාරා ලොහකාරා සොණ්ණකාරා ච දුස්සිකා,
තිපුකාරා ච තෙ සබ්බෙ ආගච්ඡන්ති මමං ඝරං.

4186. උසුකාරා භමකාරා පෙසකාරා ච ගන්ධීකා,
රජ කා තුන්නවායා ච ආගච්ඡන්ති මමං ඝරං.

4187. තෙලිකා කට්ඨහාරා ච උදහාරා ච පෙස්සිකා,
සූපිකා සුපරක්ඛා ච ආගච්ඡන්ති මමං ඝරං.

4188. දොවාරිකා අනීකට්ඨා වන්දිකා පුප්ඵඡඩ්ඩකා,
හත්ථාරුහා හත්ථිපාලා ආගච්ඡන්ති මමං ඝරං.

4189. ආනන්දස්ස මහාරඤ්ඤො පමත්තස්ස අදාසහං,
සත්තවණ්ණෙන රතනෙන ඌනත්තං පූරයාමහං.

4190. යෙ මයා කිත්තිතා සබ්බෙ නානාවණ්ණා බහුජ්ජනා,
තෙසා’හං චිත්තමඤ්ඤාය තප්පයිං රතනෙන’හං.

4191. වග්ගූසු භාසමානාසු වජ්ජමානාසු භෙරිසු,
සංඛෙසු ධමයන්තෙසු සකගෙහෙ රමාමහං.