4219. හිමවන්තස්ස අවිදූරෙ පදුමො නාම පබ්බතො,
අස්සමො සුකතො මය්හං පණ්ණසාලා සුමාපිතා.

4220. නදියො සන්දරෙ සුපතිත්ථා මනොරමා,
අච්ඡොදකා සීතජලා සුන්දරා නදියො සදා.

4221. පාඨීනා පාවුසා මච්ඡා වලජා මුඤ්ජරොහිතා,
සොභෙන්තා නදියො එතෙ වසන්ති නදියා සදා.

4222. අම්බජම්බූහි සඤ්ඡන්නා කරෙරිතිලකා තථා,
උද්දාලකා පාටලියො සොභෙන්ති මම අස්සමං.

4223. අඞ්කොලකා බිම්බිජාලා මායාකාරී ච පුප්ඵිතා,
ගන්ධෙන උපවායන්තා සොභෙන්ති මම අස්සමං.

4224. අතිමුත්තා සත්තලිකා නාගා සාලා ච පුප්ඵිතා,
දිබ්බගන්ධං සම්පවන්තා සොභෙන්ති මම අස්සමං.

4225. කොසම්බා සලලා නීපා අට්ඨඞ්ගා ච සුපුප්ඵිතා,
දිබ්බගන්ධං සම්පවන්තා සොභෙන්ති මම අස්සමං.

4226. හරීතකා ආමලකා අම්බජම්බු විභීටකා,
කොලා භල්ලාතකා බිල්ලා ඵලානි බහු අස්සමෙ.

4227. කලම්බා කන්දලී තත්ථ පුප්ඵන්ති මම අස්සමෙ,
දිබ්බගන්ධං සම්පවන්තා සොභෙන්ති මම අස්සමං.

4228. අසොකපිණ්ඩී චවරී නිම්බරුක්ඛා ච පුප්ඵිතා,
දිබ්බගන්ධං සම්පවන්තා සොභෙන්ති මම අස්සමං.

4229. පුන්නාගා ගිරිපුන්නාගා තිමිරා තත්ථ පුප්ඵිතා,
දිබ්බගන්ධං සම්පවන්තා සොභෙන්ති මම අස්සමං.

4230. නිග්ගුණ්ඩී සිරිනිග්ගුණ්ඩී චම්පරුක්ඛෙත්ථ පුප්ඵිතා,
දිබ්බගන්ධං සම්පවන්තා සොභෙන්ති මම අස්සමං.

4231. අවිදූරෙ පොක්ඛරණී චක්කවාකූපකූජිතා,
මන්දාලකෙහි සඤ්ඡන්නා පදුමුප්පලකෙහි ච.

4232. අච්ඡොදකා සීතජලා සුපතිත්ථා මනොරමා,
අච්ඡා ඵලිකසමානා සොභෙන්ති මම අස්සමං.

4233. පදුමා පුප්ඵරෙ තත්ථ පුණ්ඩරීකා ච උප්පලා,
මන්දාලකෙහි සඤ්ඡන්නා සොභෙන්ති මම අස්සමං.

4234. පාඨීනා පාවුසා මච්ඡා වලජා මුඤ්ජරොහිතා,
විචරන්තා ච තෙ තත්ථ සොභෙන්ති මම අස්සමං.

4235. කුම්භීලා සුංසුමාරා ච කච්ඡපා ච ගහා බහූ,
ඔගුහා අජගරා ච සොභෙන්ති මම අස්සමං.

4236. පාරෙවතා රවිහංසා චක්කවාකා නදීචරා,
දින්දිභා සාලිකා චෙත්ථ සොභෙන්ති මම අස්සමං.

4237. නයිතා අම්බගන්ධී ච කෙතකා තත්ථ පුප්ඵිතා,
දිබ්බගන්ධං සම්පවන්තා සොභෙන්ති මම අස්සමං.

4238. සීහා ව්යග්ඝා ච දීපී ච අච්ඡකොකතරච්ඡකා,
අනුසඤ්චරන්තා පවනෙ සොභෙන්ති මම අස්සමං.

4239. ජටාභාරෙන භරිතා අජිනුත්තරවාසනා,
අනුසඤ්චරන්තා පවනෙ සොභෙන්ති මම අස්සමං.

4240. අජිනානි ධරා එතෙ නිපකා සන්තවුත්තිනො,
අප්පාහාරා ච තෙ සබ්බෙ සොභෙන්ති මම අස්සමං.

4241. ඛාරිභාරං ගහෙත්වාන අජ්ඣොගය්හ වනං තදා,
මූලඵලානි භුඤ්ජන්තා වසන්ති අස්සමෙ සදා.

4242. න තෙ දාරුං ආහරන්ති උදකං පාදධොවනං,
සබ්බෙසං ආනුභාවෙන සයමෙවාහරීයති.

4243. චුල්ලාසීති සහස්සානි ඉසයෙත්ථ සමාගතා,
සබ්බෙව ඣායිනො එතෙ උත්තමත්ථගවෙසකා.

4244. තපස්සිනො බ්රහ්මචාරී චොදෙන්තා අප්පණාවතෙ,
අම්බරාවචරා සබ්බෙ වසන්ති අස්සමෙ තදා.

4245. පඤ්චාහං සන්නිපතන්ති එකග්ගා සන්තවුත්තිනො,
අඤ්ඤොඤ්ඤං අභිවාදෙත්වා පක්කමන්ති දිසාමුඛා.