3990. හිමවන්තස්ස අවිදූරෙ අනොමො නාම පබ්බතො,
අස්සමො සුකතො මය්හං පණ්ණසාලා සුමාපිතා.

3991. නදී ච සන්දතී තත්ථ සූපතිත්ථා මනොරමා,
අනුපතිත්ථෙ ජායන්තී පදුමුප්පලකා බහූ.

3992. පාඨීනා පාවුසා මච්ඡා වලජා මුඤ්ජරොහිතා,
මච්ඡකච්ඡපසඤ්ඡන්නා නදිකා සන්දතෙ සදා.

3993. තිමිරා පුප්ඵිතා තත්ථ අසොකා ඛුද්දමාලකා,
පුන්නාගා ගිරිපුන්නාගා සම්පවන්ති මමස්සමං.

3994. කුටජා පුප්ඵිතා තත්ථ තිණසූලවනානි ච,
සාලා ච සලලා තත්ථ චම්පකා පුප්ඵිතා බහූ.

3995. අජ්ජුනා අතිමුත්තා ච මහානාමා ච පුප්ඵිතා,
අසනා මධුගන්ධී ච පුප්ඵිතා තෙ මමස්සමෙ.

3996. උද්දාලකා පාටලිකා යූථිකා ච පියඞ්ගුකා,
බිම්බිජාලකසඤ්ඡන්නා සමන්තා අඩ්ඪයොජනං.

3997. මාතඞ්ගවා සත්තලියො පාටලී සින්දුවාරකා,
අඞ්කොලකා බහූ තත්ථ තාලකූටා ච පුප්ඵිතා.

3998. සෙලෙය්යකා බහූ තත්ථ පුප්ඵිතා මම අස්සමෙ,
එතෙසු පුප්ඵමානෙසු සොභන්ති පාදපා බහූ,
සමන්තා තෙන ගන්ධෙන වායතෙ මම අස්සමො.

3999. හරීතකා ආමලකා අම්බා ජම්බූ විභීටකා,
කොලා භල්ලාතකා බිල්ලා ඵාරුසකඵලානි ච.

4000. තින්දුකා ච පියාලා ච මධුකා කාසුමාරියො,
ලබුජා පනසා තත්ථ කදලී බදරීඵලා.

4001. අම්බාටකා බහූ තත්ථ වල්ලිකාරඵලානි ච,
බීජපූරසපාරියො ඵලිතා මම අස්සමෙ.

4002. ආළකා ඉසිමුග්ගා ච තතො මොදඵලා බහූ,
අවටා පක්කභරිතා පිලකඛුදුම්බරානි ච.

4003. පිප්ඵලී මරිචා තත්ථ නිග්රොධා ච කපිත්ථනා,
උදුම්බරකා බහවො කණ්ඩපක්කා ච පාරියො

4004. එතෙ චඤ්ඤෙ ච බහවො ඵලිතා අස්සමෙ මම,
පුප්ඵරුක්ඛාපි බහවො පුප්ඵිතා මම අස්සමෙ.

4005. ආලුවා ච කළම්බා ච බිලාලී තක්කලානි ච,
ආලකා තාලකා චෙව විජ්ජන්ති අස්සමෙ මම.

4006. අස්සමස්සා’විදූරෙ මෙ මහාජාතස්සරො අහු,
අච්ඡොදකො සීතජලො පුතතිත්ථො මනොරමො.

4007. පදුමුප්පලා බහූ තත්ථ පුණ්ඩරීකසමායුතා,
මන්දාලකෙහි සඤ්ඡන්නා නානාගන්ධසමෙරිතා.