3828. මහාසමුද්දං ඔගය්හ භවනං මෙ සුනිම්මිතං,
සුනිම්මිතා පොක්ඛරණී චක්කවාකූපකූජිතා.

3829. මන්දාලකෙහි සඤ්ඡන්නා පදුමුප්පලකෙහි ච,
නදී ච සන්දතෙ තත්ථ සුපතිත්ථා මනොරමා.

3830. මච්ඡකච්ඡපසඤ්ඡන්නා නානාදිජසමොත්ථතා,
මයූරකොඤ්චාභිරුදා කොකිලාදීහි වග්ගුහි.

3831. පාරෙවතා රවිහංසා චක්කවාකා නදීචරා,
දින්දිභා සාළිකා චෙත්ථ පම්පකා ජීවජීවකා.

3832. හංසා කොඤ්චාභිනදිතා කොසියා පිඞ්ගලා බහූ,
සත්තරතනසම්පන්නො මණිමුත්තිකවාලුකා.

3833. සබ්බසොණ්ණමයා රුක්ඛා නානාගන්ධසමෙරිතා,
උජ්ජොතෙන්ති දිවාරත්තිං භවනං සබ්බකාලිකං.

3834. සට්ඨිතුරියසහස්සානි සායං පාතො පවජ්ජරෙ,
සොළසිත්ථිසහස්සානි පරිවාරෙන්ති මං සදා.

3835. අභිනික්ඛම්ම භවනා සුමෙධං ලොකනායකං,
පසන්නචිත්තො සුමනො වන්දයිං තං මහායසං.

3836. සම්බුද්ධං අභිවාදෙත්වා සසඞ්ඝං තං නිමන්තයිං,
අධිවාසෙසි සො ධීරො සුමෙධො ලොකනායකො.

3837. මම ධම්මකථං කත්වා උය්යොජෙසි මහාමුනි,
සම්බුද්ධං අභිවාදෙත්වා භවනං මෙ උපාගමිං.

3838. ආමන්තයිං පරිජනං සබ්බෙ සන්නිපතාථ වො,
පුබ්බන්හසමයං බුද්ධො භවනං ආගමිස්සති.

3839. ලාභා අම්හං සුලද්ධං නො යෙ වසාම තවන්තිකෙ,
මයම්පි බුද්ධසෙට්ඨස්ස පූජං කස්සාම සත්ථුනො.

3840. අන්නං පානං පට්ඨපෙත්වා කාලමාරොචයිං අහං,
වසීසතසහස්සෙහි උපෙසි ලොකනායකො.

3841. පඤ්චඞ්ගිකෙහි තුරියෙහි පච්චුග්ගමනමකාසහං,
සබ්බසොවණ්ණමයෙ පීඨෙ නිසීදි පුරිසුත්තමො.

3842. උපරිච්ඡදනං ආසි සබ්බසොණ්ණමයං තදා,
වීජනියො පවායන්ති භික්ඛුසඞ්ඝස්ස අන්තරෙ.

3843. පහූතෙන’න්නපානෙන භික්ඛුසංඝමතප්පයිං,
පච්චෙකදුස්සයුගලෙ භික්ඛුසඞ්ඝස්ස’දාසහං.

3844. යං වදන්ති සුමෙධොති ලොකාහුතිපටිග්ගහං,
භික්ඛුසඞ්ඝෙ නිසීදිත්වා ඉමා ගාථා අභාසථ.

3845. “යො මං අන්නෙන පානෙන සබ්බෙ ඉමෙ ච තප්පයි,
තමහං කිත්තයිස්සාමි සුණාථ මම භාසතො.

3846. අට්ඨාරසෙ කප්පසතෙ දෙවලොකෙ රමිස්සති,
සහස්සක්ඛත්තුං රාජා ච චක්කවත්තී භවිස්සති.

3847. උපගච්ඡති යං යොනිං දෙවත්තං අථ මානුසං,
සබ්බදා සබ්බසොවණ්ණං ඡදනං ධාරයිස්සති.

3848. තිංසකප්පසහස්සම්හි ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.