3856. පදුමුත්තරො නාම ජිනො සබ්බධම්මානපාරගූ,
අජ්ඣොගහෙත්වා හිමවන්තං නිසීදි ලොකනායකො.

3857. නා’හං අද්දක්ඛිං සම්බුද්ධං නපි සද්දං සුණොමහං,
මම භක්ඛං ගවෙසන්තො ආහිණ්ඩාමි වනෙ තදා.

3858. තත්ථ’ද්දසාසිං සම්බුද්ධං බත්තිංසවරලක්ඛණං,
දිස්වාන චිත්තමාපජ්ජිං සත්තො කො නාම’යං භවෙ’

3859. ලක්ඛණානි විලොකෙත්වා මම විජ්ජං අනුස්සරිං,
සුතං හි මෙ’තං වුද්ධානං පණ්ඩිතානං සුභාසිතං.

3860. තෙසං යථා තං වචනං අයං බුද්ධො භවිස්සති,
යන්නූනාහං සක්කරෙය්යං ගතිං මෙ සොධයිස්සති.

3861. ඛිප්පං අස්සමමාගන්ත්වා මධුතෙලං ගහිං අහං,
කොළම්බකං ගහෙත්වාන උපගච්ඡිං නරාසභං.

3862. තිදණ්ඩකෙ ගහෙත්වාන අබ්භොකාසෙ ඨපෙසහං,
පදීපං පජ්ජලෙත්වාන අට්ඨක්ඛත්තුං අවන්දහං.

3863. සත්තරත්තින්දිවං බුද්ධො නිසීදි පුරිසුත්තමො,
තතො රත්යා විවසානෙ වුට්ඨාසි ලොකනායකො.

3864. පසන්නචිත්තො සුමනො සත්තරත්තින්දිවං අහං,
දීපං බුද්ධස්ස පාදාසිං පසන්නො සෙහි පාණිහි.

3865. සබ්බෙ වනා ගන්ධමයා පබ්බතෙ ගන්ධමාදනෙ,
බුද්ධස්ස අනුභාවෙන උපගච්ඡුං තදා ජිනං.

3866. යෙ කෙචි පුප්ඵගන්ධාසෙ පුප්ඵිතා ධරණීරුහා,
බුද්ධස්ස අනුභාවෙන සබ්බෙ සන්නිපතුං තදා.

3867. යාවතා හිමවන්තම්හි නාගා ච ගරුළා උභො,
ධම්මඤ්ච සොතුකාමා තෙ ආගච්ඡුං බුද්ධසන්තිකං.

3868. දෙවලො නාම සමණො බුද්ධස්ස අග්ගසාවකො,
වසීසතසහස්සෙහි බුද්ධසන්තිකුපාගමි.

3869. පදුමුත්තරො ලොකවිදූ ආහුතීනං පටිග්ගහො,
භික්ඛුසඞ්ඝෙ නිසීදිත්වා ඉමා ගාථා අභාසථ.

3870. යො මෙ දීපං පදීපෙසි පසන්නො සෙහි පාණිහි,
තමහං කිත්තයිස්සාමි සුණාථ මම භාසතො.

3871. සට්ඨිකප්පසහස්සානි දෙවලොකෙ රමිස්සති,
සහස්සක්ඛතුං රාජා චක්කවත්තී භවිස්සති.

3872. ඡත්තිංසක්ඛත්තුං දෙවින්දො දෙවරජ්ජං කරිස්සති,
පඨවියං සත්තසතං විපුලං රජ්ජං කරිස්සති,
පදෙසරජ්ජං විපුලං ගණනාතො අසඞ්ඛියං.

3873. ඉමිනා දීපදානෙන දිබ්බචක්ඛු භවිස්සති,
සමන්තතො අට්ඨකොසං පස්සිස්සති අයං සදා.

3874. දෙවලොකා චවන්තස්ස නිබ්බත්තන්තස්ස ජන්තුනො,
දිවා වා යදි වා රත්තිං පදීපං ධාරයිස්සති.

3875. ජායමානස්ස සත්තස්ස පුඤ්ඤකම්මසමඞ්ගිනො,
යාවතා නගරං හොති තාවතා ජොතයිස්සති.

3876. උපපජ්ජති යං යොනිං දෙවත්තං අථ මානුසං,
අස්සෙව දීපදානස්ස අට්ඨදීපඵලෙන හි,
න ජයිස්සන්ති’මං ජන්තු දීපදානස්සිදං ඵලං.

3877. කප්පසතසහස්සම්හි ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.