3791. භරියා මෙ කාලකතා පුත්තො සීවථිකං ගතො,
මාතා පිතා ච භාතා ච එකචිතකම්හි ඩය්හරෙ.

3792. තෙන සොකෙන සන්තත්තො කිසො පණ්ඩු අහොසහං,
චිත්තක්ඛෙපො ච මෙ ආසි තෙන සොකෙන අට්ටිතො.

3793. සොකසල්ලපරෙතො’හං වනන්තමුපසඞ්කමිං,
පවත්තඵලං භුඤ්ජිත්වා රුක්ඛමූලෙ වසාමහං.

3794. සුමෙධො නාම සම්බුද්ධො දුක්ඛස්ස’න්තකාරො ජිනො,
මමුද්ධරිතුකාමො සො ආගච්ඡි මම සන්තිකෙ.

3795. පදසද්දං සුණිත්වාන සුමෙධස්ස මහෙසිනො,
පග්ගහෙත්වාන’හං සීසං උල්ලොකෙසිං මහාමුනිං.

3796. උපගච්ඡි මහාවීරො පීති මෙ උපපජ්ජථ,
තදා’සි මෙකග්ගමනො දිස්වා තං ලොකනායකං.

3797. සතිං පටිලභිත්වාන පණ්ණමුට්ඨිමදාසහං,
නිසීදි භගවා තත්ථ අනුකම්පාය චක්ඛුමං.

3798. නිසජ්ජ තත්ථ භගවා සුමෙධො ලොකනායකො,
ධම්මං මෙ කථයී බුද්ධො සොකසල්ලවිනොදනං.

3799. “අනවහිතා තතො ආගුං අනනුඤ්ඤාතා ඉතො ගතා,
යථා’ගතා තථා ගතා තත්ථ කා පරිදෙවනා.

3800. යථාපි පථිකා සත්තා වස්සමානාය වුට්ඨියා,
සභණ්ඩා උපගච්ඡන්ති වස්සස්සාපතනාය තෙ.

3801. වස්සෙ ච තෙ ඔරමිතෙ සම්පයන්ති යදිච්ඡකං,
එවං මාතා පිතා තුය්හං කත්ථ කා පරිදෙවනා.

3802. ආගන්තුකා පාහුණකා චලිතෙරිතකම්පිතා,
එවං මාතා පිතා තුය්හං තත්ථ කා පරිදෙවනා.

3803. යථාපි උරගො ජිණ්ණං හිත්වා ගච්ඡති සන්තචං,
එවං මාතා පිතා තුය්හං සන්තනුං ඉධ හීයරෙ.”

3804. බුද්ධස්ස ගිරමඤ්ඤාය සොකලස්සං විවජ්ජයිං,
පාමොජ්ජං ජනයිත්වාන බුද්ධසෙට්ඨමවන්දිහං.

3805. වන්දිත්වාන මහානාගං ගිරිමඤ්ජරිමපූජයිං,
දිබ්බගන්ධෙන සම්පන්නං සුමෙධං ලොකනායකං.

3806. පූජයිත්වාන සම්බුද්ධං සිරෙ කත්වාන අඤ්ජලිං,
අනුස්සරං ගුණග්ගානි සන්ථවිං ලොකනායකං.

3807. නිත්තිණ්ණොසි මහාවීර සබ්බඤ්ඤූ ලොකනායක,
සබ්බෙ සත්තෙ උද්ධරසි ඤාණෙන ත්වං මහාමුනෙ.

3808. විමතිං ද්වෙළ්හකං චාපි සඤ්ඡින්දසි මහාමුනි,
පටිපාදෙසි මෙ මග්ගං තව ඤාණෙන චක්ඛුම.

3809. අරහා සිද්ධිපත්තා ච ඡළභිඤ්ඤා මහිද්ධිකා,
අන්තලික්ඛචරා ධීරා පරිවාරෙන්ති තාවදෙ.