3758. හිමවන්තස්ස අවිදූරෙ සොභිතො නාම පබ්බතො,
අස්සමො සුකතො මය්හං සකසිස්සෙහි මාපිතො.

3759. මණ්ඩපා ච බහූ තත්ථ පුප්ඵිතා සින්දුවාරකා,
කපිත්ථා ච බහූ තත්ථ පුප්ඵිතා ජීවජීවකා,

3760. නිග්ගුණ්ඩියො බහූ තත්ථ බදරාමලකානි ච,
ඵාරුසකා අලාබූ ච පුණ්ඩරීකා ච පුප්ඵිතා.

3761. ආලකා බෙලුවා තත්ථ කදලී මාතුලුඞ්ගකා,
මහානාමා බහූ තත්ථ අජ්ජුනා ච පියඞ්ගුකා.

3762. කොසම්බා සලලා නීපා නිග්රොධා ච කපිත්ථනා,
එදිසො අස්සමො මය්හං සසිස්සොහං තහිං වසිං.

3763. අනොමදස්සී භගවා සයම්භූ ලොකනායකො,
ගවෙසං පටිසල්ලානං මමස්සමමුපාගමී.

3764. උපෙතම්හි මහාවීරෙ අනොමදස්සිමහායසෙ,
ඛණෙන ලොකනාථස්ස වාතාබාධො සමුට්ඨහි.

3765. විචරන්තො අරඤ්ඤම්හි අද්දසං ලොකනායකං,
උපගන්ත්වාන සම්බුද්ධං චක්ඛුමන්තං මහායසං.

3766. ඉරියඤ්චාපි දිස්වාන උපලක්ඛෙස’හං තදා,
අසංසයං හි බුද්ධස්ස ව්යාධි නො උපපජ්ජථ

3767. ඛිප්පං අස්සමමාගච්ඡිං මම සිස්සාන සන්තිකෙ,
භෙසජ්ජං කත්තුකාමො’හං සිස්සෙ ආමන්තයිං තදා.

3768. පටිස්සුණිත්වා මෙ වාක්යං සිස්සා සබ්බෙ සගාරවා,
එකජ්ඣං සන්නිපතිංසු සත්ථුගාරවතා මම.

3769. ඛිප්පං පබ්බතමාරුය්හ සබ්බොසධමහාසහං,
පානීයයොගං කත්වාන බුද්ධසෙට්ඨස්ස’දාසහං.

3770. පරිභුත්තෙ මහාවීරෙ සබ්බඤ්ඤුලොකනායකෙ,
ඛිප්පං වාතො වූපසමි සුගතස්ස මහෙසිනො.

3771. පස්සද්ධං දරථං දිස්වා අනොමදස්සී මහායසො,
සකාසනෙ නිසීදිත්වා ඉමා ගාථා අභාසථ:

3772. “යො මෙ පාදාසි භෙසජ්ජං ව්යාධිඤ්ච සමයී මම,
තමහං කිත්තයිස්සාමි සුණාථ මම භාසතො.

3773. කප්පසතසහස්සානි දෙවලොකෙ රමිස්සති,
වාදිතෙ තුරියෙ තත්ථ මොදිස්සති සදා අයං.

3774. මනුස්සලොකමාගන්ත්වා සුක්කමූලෙන චොදිතො,
සහස්සක්ඛත්තුං රාජා ච චක්කවත්තී භවිස්සති.

3775. පඤ්චපඤ්ඤාසකප්පම්භි අනොමො නාම ඛත්තියො,
චාතුරන්තො විජිතාවී ජම්බුමණ්ඩස්ස ඉස්සරො.

3776. සත්තරතනම්පන්නො චක්කවත්තී මහබ්බලො,
තාවතිංසෙපි ඛොභෙත්වා ඉස්සරං කාරයිස්සති.

3777. දෙවභූතො මනුස්සො වා අප්පාබාධො භවිස්සති,
පරිග්ගහං විවජ්ජෙත්වා ව්යාධිං ලොකෙ තරිස්සති.

3778. අපරිමෙය්යෙ ඉතො කප්පෙ ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.

3779. තස්ස ධම්මෙසු දායාදො ඔරසො ධම්මනිම්මිතො,
සබ්බාසවෙ පරිඤ්ඤාය නිබ්බායිස්සතනාසවො.

3780. කිලෙසෙ ඣාපයිත්වාන තණ්හාසොතං තරිස්සති,
බක්කුලො නාම නාමෙන හෙස්සති සත්ථුසාවකො.

3781. ඉදං සබ්බං අභිඤ්ඤාය ගොතමො සක්යපුඞ්ගවො,
භික්ඛුසඞ්ඝෙ නිසීදිත්වා එතදග්ගෙ ඨපෙස්සති.”