1003. සත්තාහං පටිසල්ලීනං සයම්භුං අග්ගපුග්ගලං,
පසන්නචිත්තො සුමනො බුද්ධසෙට්ඨං උපට්ඨහිං.

1004. වුට්ඨිතං කාලමඤ්ඤාය පදුමුත්තරං මහාමුනිං,
මහන්තිං කදලීකණ්ණිං ගහෙත්වා උපගඤ්ඡ’හං.

1005. පටිග්ගහෙත්වා භගවා තං ඵලං ලොකනායකො,
මම චිත්තං පසාදෙන්තො පරිභුඤ්ජි මහාමුනි.

1006. පරිභුඤ්ජිත්වාන සම්බුද්ධො සත්ථවාහො අනුත්තරො,
සකාසනෙ නිසීදිත්වා ඉමා ගාථා අභාසථ.

1007. “යෙ වසන්ති සමෙතාරො යක්ඛා ඉමම්හි පබ්බතෙ,
අරඤ්ඤෙ භූතභව්යානි සුණන්තු වචනං මම.

1008. යො සො බුද්ධං උපට්ඨාසි මිගරාජා ච කෙසරී
තමහං කිත්තයිස්සාමි සුණාථ මම භාසතො.

1009. සො’යමෙකාදසක්ඛත්තුං දෙවරාජා භවිස්සති,
චතුත්තිංසක්ඛත්තුඤ්ච චක්කවත්තී භවිස්සති.

1010. කප්පසතසහස්සම්හි ඔක්කාකකුලසම්භවො,
ගොතමො නාම ගොත්තෙන සත්ථා ලොකෙ භවිස්සති.

1011. අක්කොසිත්වාන සමණෙ සීලවන්තෙ අනාසවෙ,
පාපකම්මවිපාකෙන නාමධෙය්යං ලභිස්සති.

1012. තස්ස ධම්මෙසු දායාදො ඔරසො ධම්ම නිම්මිතො,
කුණ්ඩධානොති නාමෙන සාවකො සො භවිස්සති.

1013. පවිවෙකමනුයුත්තො ඣායී ඣානරතො අහං,
තොසයිත්වාන සත්ථාරං විහරාමි අනාසවො.

1014. සාවකග්ගෙහි පරිවුතො භික්ඛුසඞ්ඝපුරක්ඛතො,
භික්ඛුසඞ්ඝෙ නිසීදිත්වා සලාකං ගාහයී ජිනො.

1015. එකංසං චීවරං කත්වා වන්දිත්වා ලොකනායකං,
වදතං වරස්ස පුරතො පඨමං අග්ගහෙස’හං

1016. තෙන කම්මෙන භගවා දසසහස්සීපකම්පකො,
භික්ඛුසඞ්ඝෙ නිසීදිත්වා අග්ගට්ඨානෙ ඨපෙසි මං.

1017. විරියං මෙ ධුරධොරය්හං යොගක්ඛෙමාධිවාහනං,
ධාරෙමි අන්තිමං දෙහං සම්මාසම්බුද්ධසාසනෙ.

1018. පටිසම්භිදා -පෙ- බුද්ධස්ස සාසනං.

1019. සොභිතො නාම නාමෙන අහොසිං බ්රාහ්මණො තදා,
පුරක්ඛතො සසිස්සෙහි ආරාමං අගමාස’හං

1020. භගවා තම්හි සමයෙ භික්ඛුසඞ්ඝපුරක්ඛතො,
ආරාමද්වාරා නික්ඛම්ම අට්ඨාසි පුරිසුත්තමො.

1021. තමද්දසාසිං සම්බුද්ධං දන්තං දන්තපුරක්ඛතං,
සකං චිත්තං පසාදෙත්වා සන්ථවිං ලොකනායකං.