3303. සුවණ්ණවණ්ණං සම්බුද්ධං ආහුතීනං පටිග්ගහං,
රථියං පටිපජ්ජන්තං ඵාරුසඵලමදාසහං.

3304. එකනවුතෙ ඉතො කප්පෙ යං ඵලමදදිං අහං,
දුග්ගතිං නාභිජානාමි ඵලදානස්සිදං ඵලං.

3305. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

3306. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

3307. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3308. සබ්බෙ ජනා සමාගම්ම අගමිංසු වනං තදා,
ඵලමන්වෙසමානා තෙ අලභිංසු ඵලං තදා.

3309. තත්ථද්දසාසිං සම්බුද්ධං සයම්භුං අපරාජිතං,
පසන්නචිත්තො සුමනො වල්ලිඵලමදාසහං.

3310. එකතිංසෙ ඉතො කප්පෙ යං ඵලමදදිං තදා,
දුග්ගතිං නාභිජානාමි ඵලදානස්සිදං ඵලං.

3311. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

3312. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

3313. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3314. කණිකාරංව ජලිතං පුණ්ණමාසෙව චන්දිමං,
ජලන්තං දීපරුක්ඛංව අද්දසං ලොකනායකං.

3315. කදලිඵලං පග්ගය්හ අදාසිං සත්ථුනො අහං,
පසන්නචිත්තො සුමනො වන්දිවත්වාන අපක්කමිං.

3316. එකතිංසෙ ඉතො කප්පෙ යං ඵලං අදදිං තදා,
දුග්ගතිං නාභිජානාමි ඵලදානස්සිදං ඵලං.