3165. දිවාවිහාරා නික්ඛන්තො විපස්සී ලොකනායකො,
භික්ඛාය විචරන්තො සො මම සන්තිකමුපාගමි.

3166. කතො පතීතො සුමනො බුද්ධසෙට්ඨස්ස තාදිනො,
ලොණසුපුටකං දත්වා කප්පං සග්ගම්හි මොදහං.

3167. එකනවුතෙ ඉතො කප්පෙ යං සුපුටකමදාසහං,
දුග්ගතිං නාභිජානාමි පුටකස්ස ඉදං ඵලං.

3168. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3169. විපස්සිනො භගවතො ලොකජෙට්ඨස්ස තාදිනො,
එකං මඤ්චං මයා දින්නං පසන්නෙන සපාණිනා.

3170. හත්ථියානං අස්සයානං දිබ්බයානං සමජ්ඣගං,
තෙන මඤ්චකදානෙන පත්තොම්හි ආසවක්ඛයං.

3171. එකනවුතෙ ඉතො කප්පෙ යං මඤ්චමදදිං තදා,
දුග්ගතිං නාභිජානාමි මඤ්චදානස්සිදං ඵලං.

3172. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3173. ආරුභිම්හ තදා නාමං භික්ඛු චාජීවකො චහං,
නාවාය භිජ්ජමානාය භික්ඛු මෙ සරණං අදා.

3174. එකතිංසෙ ඉතො කප්පෙ යං ච මෙ සරණං අදා,
දුග්ගතිං නාභිජානාමි සරණගමනෙ ඵලං.

3175. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3176. තිස්සො නාමාසි සම්බුද්ධො විහාසි විපිනෙ තදා,
තුසිතා හි ඉධාගන්ත්වා පිණ්ඩපාතමදාසහං.

3177. සම්බුද්ධමභිවාදෙත්වා තිස්සං නාම මහායසං,
සකං චිත්තං පසාදෙත්වා තුසිතං අගමාසහං.

3178. ද්වෙනවුතෙ ඉතො කප්පෙ යං දානමදදිං තදා,
දුග්ගතිං නාභිජානාමි පිණ්ඩපාතස්සිදං ඵලං.

3179. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.