3021. නගරෙ හංසවතියා අහොසිං බ්රාහ්මණො තදා,
අජ්ඣායකො මන්තධරො තිණ්ණං වෙදාන පාරගූ.

3022. පුරක්ඛතො සසිස්සෙහි ජාතිමා ච සුසික්ඛිතො,
තොයාභිසෙවනත්ථාය නගරා නික්ඛමිං තදා.

3023. පදුමුත්තරො නාම ජිනො සබ්බධම්මාන පාරගූ,
ඛීණාසවසහස්සෙහි නගරං පාවිසී ජිනො.

3024. සුචාරුරූපං දිස්වාන අනෙජකාරිතං විය,
පරිවුතමරහන්තෙහි දිස්වා චිත්තං පසාදයිං.

3025. සිරසි අඤ්ජලිං කත්වා නමස්සිත්වාන සුබ්බතං,
පසන්නචිත්තො සුමනො උත්තරීයමදාසහං.

3026. උභො හත්ථෙහි පග්ගය්හ සාටකං උක්ඛිපිං අහං,
යාවතා බුද්ධපරිසා තාව ඡාදෙසි සාටකො.

3027. පිණ්ඩචාරං චරන්තස්ස මහාභික්ඛුගණාදිනො,
ඡදං කරොන්තො අට්ඨාසි හාසයන්තො මමං තදා.

3028. ඝරතො නික්ඛමන්තස්ස සයම්භූ අග්ගපුග්ගලො,
විථියංව ඨිතො සත්ථා අකා මෙ අනුමොදනං.

3029. “පසන්නචිත්තො සුමනො යො මෙ පාදාසි සාටකං,
තමහං කිත්තයිස්සාමි සුණොථ මම භාසතො:

3030. තිංසකප්පසහස්සානි දෙවලොකෙ රමිස්සති,
පඤ්ඤාසක්ඛත්තුං දෙවින්දො දෙවරජ්ජං කරිස්සති.

3031. දෙවලොකෙ වසන්තස්ස පුඤ්ඤකම්මසමඞ්ගිනො,
සමන්තා යොජනසතං දුස්සච්ඡන්නං භවිස්සති.

3032. ඡත්තිංසක්ඛත්තුං රාජා ච චක්කවත්තී භවිස්සති,
පදෙසරජ්ජං විපුලං ගණනාතො අසංඛියං.

3033. භවෙ සංසරමානස්ස පුඤ්ඤකම්මසමඞ්ගිනො,
මනසා පත්ථිතං සබ්බං නිබ්බත්තිස්සති තාවදෙ.

3034. කොසෙය්යකම්බලීයානි ඛොමකප්පාසිකානි ච,
මහග්ඝානි ච දුස්සානි පටිලච්ඡතයං නරො.

3035. මනසා පත්ථිතං සබ්බං පටිලච්ඡතයං නරො,
එකදුස්සස්ස විපාකං අනුභොස්සති සබ්බදා.

3036. සො පච්ඡා පබ්බජිත්වාන සුක්කමූලෙන චොදිතො,
ගොතමස්ස භගවතො ධම්මං සච්ඡිකරිස්සති.”

3037. අහො මෙ සුකතං කම්මං සබ්බඤ්ඤුස්ස මහෙසිනො,
එකාහං සාටකං දත්වා පත්තොම්හි අමතං පදං.

3038. මණ්ඩපෙ රුක්ඛමූලෙ වා වසතො සුඤ්ඤකෙ ඝරෙ,
ධාරෙති දුස්සඡදනං සමන්තා ව්යාමතො මම.

3039. අවිඤ්ඤත්තං නිවාසෙමි චීවරං පච්චයඤ්ච’හං,
ලාභී අන්නස්ස පානස්ස උත්තරෙය්යස්සිදං ඵලං

3040. සතසහස්සෙ ඉතො කප්පෙ යං කම්මමකරිං තදා,
දුග්ගතිං නාභිජානාමි වත්ථදානස්සිදං ඵලං.

3041. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3042. පදුමුත්තරො නාම ජිනො සබ්බධම්මාන පාරගූ,
චතුසච්චං පකාසෙන්තො සන්තාරෙසි බහුං ජනං.

3043. අහං තෙන සමයෙන ජටිලො උග්ගතාපනො,
ධුනන්තො වාකචීරානි ගච්ඡාමි අම්බරෙ තදා.

3044. බුද්ධසෙට්ඨස්ස උපරි ගන්තුං න විසහාමහං,
පක්ඛීව සෙලමාසජ්ජ ගමනං නාලභිං තදා,

3045. න මෙ ඉදං භූතපුබ්බං ඉරියස්ස විකොපනං,
දකෙ යථා උම්මුජ්ජිත්වා එවං ගච්ඡාමි අම්බරෙ.