3042. පදුමුත්තරො නාම ජිනො සබ්බධම්මාන පාරගූ,
චතුසච්චං පකාසෙන්තො සන්තාරෙසි බහුං ජනං.

3043. අහං තෙන සමයෙන ජටිලො උග්ගතාපනො,
ධුනන්තො වාකචීරානි ගච්ඡාමි අම්බරෙ තදා.

3044. බුද්ධසෙට්ඨස්ස උපරි ගන්තුං න විසහාමහං,
පක්ඛීව සෙලමාසජ්ජ ගමනං නාලභිං තදා,

3045. න මෙ ඉදං භූතපුබ්බං ඉරියස්ස විකොපනං,
දකෙ යථා උම්මුජ්ජිත්වා එවං ගච්ඡාමි අම්බරෙ.

3046. උළාරභූතො මනුජො හෙට්ඨාසීනො භවිස්සති,
හන්දමෙනං ගවෙසිස්සං අපි අත්ථං ලභෙය්යහං.

3047. ඔරොහන්තො අන්තලික්ඛා සදදමස්සොසිං සත්ථුනො,
අනිච්චතං කථෙන්තස්ස තමහං උග්ගහිං තදා.

3048. අනිච්චසඤ්ඤමුග්ගය්හ අගමාසිං මමස්සමං,
යාවතායුං වසිත්වාන තත්ථ කාලකතො අහං.

3049. චරිමෙ වත්තමානම්හි තං ධම්මසවණං සරිං,
තෙන කම්මෙන සුකතෙන තාවතිංසමගච්ඡහං.

3050. තිංසකප්පසහස්සානි දෙවලොකෙ රමිං අහං,
එකපඤ්ඤාසක්ඛත්තුඤ්ච දෙවරජ්ජමකාරයිං.

3051. එකසත්තකික්ඛත්තුඤ්ච චක්කවත්තී අහොසහං,
පදෙසරජ්ජං විපුලං ගණනාතො අසඞ්ඛියං.

3052. පිතු ගෙහෙ නිසීදිත්වා සමණො භාවිතින්ද්රියො,
ගාථාය පරිදීපෙන්තො අනිච්චතමුදාහරි.

3053. අනුස්සරාමි තං සඤ්ඤං සංසරන්තො භවාභවෙ,
න කොටිං පටිවිජ්ඣාමි නිබ්බානං අච්චුතං පදං.

3054. අනිච්චා වත සඞ්ඛාරා උප්පාදවයධම්මිනො,
උප්පජ්ජිත්වා නිරුජ්ඣන්ති තෙසං වූපසමො සුඛො.

3055. සහ ගාථං සුණිත්වාන පුබ්බකම්මං අනුස්සරිං,
එකාසනෙ නිසීදිත්වා අරහත්තමපාපුණිං.

3056. ජාතියා සත්තවස්සොහං අරහත්තමපාපුණිං,
උපසම්පාදයී බුද්ධො ගුණමඤ්ඤාය චක්ඛුමා.

3057. දාරකොව අහං සන්තො කරණීයං සමාපයිං,
කිං මෙ කරණීයං අජ්ජ සක්යපුත්තස්ස සාසනෙ.

3058. සතසහස්සෙ ඉතො කප්පෙ යං කම්මමකරිං තදා,
දුග්ගතිං නාභිජානාමි සද්ධම්මසවණෙ ඵලං.

3059. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.