2984. පදුමුත්තරස්ස භගවතො ලොකජෙට්ඨස්ස තාදිනො,
විපිනෙ චෙතියං ආසි වාළමිගසමාකුලෙ.

2985. න කොචි විසහි ගන්තුං චෙතියං අභිවන්දිතුං,
තිණකට්ඨලතොනද්ධං පලුග්ගං ආසි චෙතියං.

2986. වනකම්මිකො තදා ආසිං පිතුපෙතාමහෙන’හං,
අද්දසං විපිනෙ ථූපං ලුග්ගං තිණලතාකුලං.

2987. දිස්වානාහං බුද්ධථූපං ගරුචිත්තං උපට්ඨහිං,
“බුද්ධසෙට්ඨස්ස ථූපො’යං පලුග්ගො අච්ඡතී වනෙ.

2988. නච්ඡන්නං නප්පතිරූපං ජානන්තස්ස ගුණාගුණං,
බුද්ධථූපමසොධෙත්වා අඤ්ඤං කම්මං පයොජයෙ.”

2989. තිණං කට්ඨඤ්ච වල්ලිඤ්ච සොධයිත්වාන චෙතියෙ,
වන්දිත්වා අට්ඨවාරානි පතිකුටිකො අගච්ඡහං.

2990. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

2991. තත්ථ මෙ සුකතං ව්යම්හං සොවණ්ණං සප්පභස්සරං,
සට්ඨියොජනමුබ්බෙධං තිංසයොජනවිත්ථතං.

2992. තිසතානි ච වාරානි දෙවරජ්ජමකාරයිං,
පඤ්චවීසතික්ඛත්තුඤ්ච චක්කවත්තී අහොස’හං.

2993. භවාභවෙ සංසරන්තො මහාභොගං ලභාමහං,
භොගෙ මෙ ඌනතා නත්ථි සොධනාය ඉදං ඵලං.

2994. සිවිකා හත්ථික්ඛන්ධෙන විපිනෙ ගච්ඡතො මම,
යං යං දිසාහං ගච්ඡාමි සරණං සම්පජ්ජතෙ වනං.

2995. ඛාණුං වා කණ්ටකං වාපි නාහං පස්සාමි චක්ඛුනා,
පුඤ්ඤකම්මෙන සංයුත්තො සයමෙවාපනීයරෙ.

2996. කුට්ඨං ගණ්ඩො කිලාසො ච අපමාරො විතච්ඡිකා,
දද්දුං කච්ඡු ච මෙ නත්ථි සොධනාය ඉදං ඵලං.

2997. අඤ්ඤම්පි මෙ අච්ඡරියං බුද්ධථූපම්හි සොධිතෙ,
නාභිජානාමි මෙ කායෙ ජාතං පිලකබින්දුකං.

2998. අඤ්ඤම්පි මෙ අච්ඡරියං බුද්ධථූපම්හි සොධිතෙ,
දුවෙ භවෙ සංසරාමි දෙවත්තෙ අථ මානුසෙ.

2999. අඤ්ඤම්පි මෙ අච්ඡරියං බුද්ධථූපම්හි සොධිතෙ,
සුවණ්ණවණ්ණො සබ්බත්ථ සප්පභාසො භවාමහං.

3000. අඤ්ඤම්පි මෙ අච්ඡරියං බුද්ධථූපම්හි සොධිතෙ,
අමනාපං විවජ්ජති මනාපං උපිට්ඨති.

3001. අඤ්ඤම්පි මෙ අච්ඡරියං බුද්ධථූපම්හි සොධිතෙ,
විසුද්ධං හොති මෙ චිත්තං එකග්ගං සුසමාහිතං.

3002. අඤ්ඤම්පි මෙ අච්ඡරියං බුද්ධථූපම්හි සොධිතෙ,
එකාසනෙ නිසීදිත්වා අරහත්තමපාපුණිං.

3003. සතසහස්සෙ ඉතො කප්පෙ යං කම්මමකරිං තදා,
දුග්ගතිං නාභිජානාමි සොධනාය ඉදං ඵලං.

3004. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.