2701. උපසාළ්හක නාමො’හං අහොසිං බ්රාහ්මණො තදා,
කානනං වනමොගාළ්හං ලොකජෙට්ඨං නරාසභං.

2702. දිස්වාන වන්දිං පාදෙසු ලොකාහුතිපටිග්ගහං,
පසන්නචිත්තං මා ඤත්වා බුද්ධො අන්තරධායථ.

2703. කානනා අභිනික්ඛම්ම බුද්ධසෙට්ඨමනුස්සරිං,
තං දෙසං කිත්තයිත්වාන කප්පං සග්ගම්හි මොදහං.

2704. ද්වෙනවුතෙ ඉතො කප්පෙ යං දෙසමභිකිත්තයිං,
දුග්ගතිං නාභිජානාමි කිත්තනාය ඉදං ඵලං.

2705. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2706. පබ්බතෙ හිමවන්තම්භි අහොසිං ලුද්දකො අහං,
විපස්සිං අද්දසං බුද්ධං ලොකජෙට්ඨං නරාසභං.

2707. උපාසිත්වාන සම්බුද්ධං වෙය්යාවච්චමකාසහං,
සරණඤ්ච උපාගච්ඡිං දිපදින්දස්ස තාදිනො.

2708. එකනවුතෙ ඉතො කප්පෙ සරණං යමගච්ඡහං,
දුග්ගතිං නාභිජානාමි සරණගමනප්ඵලං.

2709. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2710. රොමසො නාම නාමෙන දානවො ඉති විස්සුතො,
අම්බපිණ්ඩී මයා දින්නා විපස්සිස්ස මහෙසිනො,

2711. එකනවුතෙ ඉතො කප්පෙ යමම්බමදදිං තදා,
දුග්ගතිං නාභිජානාමි අම්බදානස්සිදං ඵලං.

2712. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2713. පිණ්ඩාය චරමානාහං විපස්සිං අද්දසං ජානං,
උළුඞ්කභික්ඛං පාදාසිං දිපදින්දස්ස තාදිනො.

2714. පසන්නචිත්තො සුමනො අභිවාදෙසහං තදා,
අනුසංසාවයිං බුද්ධං උත්තමත්ථස්ස පත්තියා.

2715. චතුනවුතෙ ඉතො කප්පෙ අනුසංසාවයිං අහං,
දුග්ගතිං නාභිජානාමි අනුසංසාවනාඵලං.

2716. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං

චිතකං පාරිඡත්තො ච සද්ද ගොසීසසන්ථරං
පදං පදෙසං සරණං අම්බො සංසාවකො පි ච
සත්තතාළිස ගාථායො ගණිතායො විභාවිහි.

කණිකාරො හත්ථිදදො ආලම්බණුදකාසනං
තුවරං ථොමකො වෙච උක්ඛෙපං සීසුපධානං
පණ්ණදො චිතපූජී ච ගාථායො චෙව සබ්බසො
චත්තාරි ච සතානීහ එකපඤ්ඤාසමෙව ච.
පඤ්චවීසසතා සබ්බා ද්වාසත්තති තදුත්තරි,
තිසතං අපදානානං ගණිතා අත්ථදස්සිහි.