2671. අජිතො නාම නාමෙන අහොසිං බ්රාහ්මණො තදා,
ආහුතිං යිට්ඨුකාමො’හං නානාපුප්ඵං සමානයිං.

2672. ජලන්තං චිතකං දිස්වා සිඛිනො ලොකබන්ධුනො,
තං ච පුප්ඵං සමානෙත්වා චිතකෙ ඔකිරිං අහං.

2673. එකතිංසෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

2674. සත්තවීසෙ ඉතො කප්පෙ සත්තාසුං මනුජාධිපා,
සුපජ්ජලිතනාමා තෙ චක්කවත්තී මහබ්බලා.

2675. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2676. වාකචීරධරො ආසිං අජිනුත්තරවාසනො,
අභිඤ්ඤාපඤ්චනිබ්බත්තා චන්දස්ස පරිමජ්ජකො.

2677. විපස්සිං ලොකපජ්ජොතං දිස්වා අභිගතං මම,
පාරිච්ඡත්තකපුප්ඵානි ධාරෙසිං සත්ථුනො අහං.

2678. එකනවුතෙ ඉතො කප්පෙ යං පුප්ඵමභිධාරයිං,
දුග්ගතිං නාභිජානාමි ධාරණාය ඉදං ඵලං.

2679. සත්තාසීතිම්භිතො කප්පෙ එකො ආසිං මහීපති,
සමන්තධාරණො නාම චක්කවත්තී මහබ්බලො.

2680. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2681. පුත්තො මම පබ්බජිතො කාසායවසනො තදා,
සො ච බුද්ධත්තං සම්පත්තො නිබ්බුතො ලොකපූජිතො.

2682. විචිනන්තො සකං පුත්තං අගමං පච්ඡතො අහං,
නිබ්බුතස්ස මහන්තස්ස චිතකං අගමාසහං.

2683. පග්ගය්හ අඤ්ජලිං තත්ථ වන්දිත්වා චිතකං අහං,
සෙතච්ඡත්තඤ්ච පග්ගය්හ ආරොපෙසිං අහං තදා.

2684. චතුනවුතෙ ඉතො කප්පෙ යං ඡත්තමභිරොපයිං,
දුග්ගතිං නාභිජානාමි ඡත්තදානස්සිදං ඵලං.

2685. පඤ්චවීසෙ ඉතො කප්පෙ සත්ත ආසුං ජනාධිපා,
මහාරහ සනාමා තෙ චක්කවත්තී මහබ්බලා.

2686. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2687. අනුග්ගතම්භි ආදිච්චෙ පනාදො විපුලො අහු,
බුද්ධසෙට්ඨස්ස ලොකම්හි පාතුභාවො මහෙසිනො.

2688. සද්දමස්සොසහං තත්ථ න ච පස්සාමි තං ජිනං,
මරණෙ ච අනුප්පත්තෙ බුද්ධසඤ්ඤමනුස්සරිං.

2689. චතුනවුතෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි බුද්ධසඤ්ඤායිදං ඵලං.

2690. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.