2681. පුත්තො මම පබ්බජිතො කාසායවසනො තදා,
සො ච බුද්ධත්තං සම්පත්තො නිබ්බුතො ලොකපූජිතො.

2682. විචිනන්තො සකං පුත්තං අගමං පච්ඡතො අහං,
නිබ්බුතස්ස මහන්තස්ස චිතකං අගමාසහං.

2683. පග්ගය්හ අඤ්ජලිං තත්ථ වන්දිත්වා චිතකං අහං,
සෙතච්ඡත්තඤ්ච පග්ගය්හ ආරොපෙසිං අහං තදා.

2684. චතුනවුතෙ ඉතො කප්පෙ යං ඡත්තමභිරොපයිං,
දුග්ගතිං නාභිජානාමි ඡත්තදානස්සිදං ඵලං.

2685. පඤ්චවීසෙ ඉතො කප්පෙ සත්ත ආසුං ජනාධිපා,
මහාරහ සනාමා තෙ චක්කවත්තී මහබ්බලා.

2686. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2687. අනුග්ගතම්භි ආදිච්චෙ පනාදො විපුලො අහු,
බුද්ධසෙට්ඨස්ස ලොකම්හි පාතුභාවො මහෙසිනො.

2688. සද්දමස්සොසහං තත්ථ න ච පස්සාමි තං ජිනං,
මරණෙ ච අනුප්පත්තෙ බුද්ධසඤ්ඤමනුස්සරිං.

2689. චතුනවුතෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි බුද්ධසඤ්ඤායිදං ඵලං.

2690. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2691. ආරාමද්වාරා නික්ඛම්ම ගොසීසං සන්ථතං මයා,
අනුභොමි සකං කම්මං පුබ්බකම්මස්සිදං ඵලං.

2692. ආජානීයා වාතජවා සින්ධවා සීඝවාහනා,
අනුභොමි සබ්බමෙතං ගොසීසස්ස ඉදං ඵලං.

2693. අහො කාරං පරමකාරං සුඛෙත්තෙ සුකතං මයා,
සඞ්ඝෙ කතස්ස කාරස්ස න අඤ්ඤං කලමග්ඝති.

2694. චතුනවුතෙ ඉතො කප්පෙ යං සීසං සන්ථරිං අහං,
දුග්ගතිං නාභිජානාමි සන්ථරස්ස ඉදං ඵලං.

2695. පඤ්චසත්තතිකප්පම්භි සුප්පතිට්ඨිත නාමකො,
එකො ආසිං මහාතෙජො චක්කවත්තී මහබ්බලො.

2696. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2697. පබ්බතෙ හිමවන්තම්භි අහොසිං කින්නරො තදා,
අද්දසං විරජං බුද්ධං පීතරංසිංව භානුමං.

2698. උපෙතං තමහං බුද්ධං විපස්සිං ලොකනායකං,
චන්දනං තගරඤ්චාපි පාදෙ ඔසිඤ්චහං තදා.

2699. චතුනවුතෙ ඉතො කප්පෙ යං පාදමභිපූජයිං,
දුග්ගතිං නාභිජානාමි පාදපූජායිදං ඵලං.

2700. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.