948. නගරෙ චන්දවතියා භතකො ආස’හං තදා,
පරකම්මායනෙ යුත්තෙ පබ්බජ්ජං න ලභාම’හං.

949. තමන්ධකාරපිහිතා තිවිධග්ගීහි ඩය්හරෙ,
කෙන නු ඛො උපායෙන විසංයුත්තො භවෙ අහං.

950. දෙය්යධම්මො ච මෙ නත්ථි වරාකො භතකො අහං,
යන්නූනා’හං පඤ්චසීලං රක්ඛෙය්යං පරිපූරයං.

951. අනොමදස්සී මුනිනො නිසභො නාම සාවකො,
තම’හං උපසඞ්කම්ම පඤ්චසික්ඛාපද’ග්ගහිං.

952. වස්සසතසහස්සානි ආයු විජ්ජති තාවදෙ,
තාවතා පඤ්ච සීලානි පරිපුණ්ණානි ගොපයිං.

953. මච්චුකාලම්භි සම්පත්තෙ දෙවා අස්සාසයන්ති මං,
රථො සහස්සස්සයුත්තො මාරිසා’යං උපට්ඨිතො.

954. වත්තන්තෙ චරිමෙ චිත්තෙ මම සීලං අනුස්සරිං,
තෙන කම්මෙන සුකතෙන තාවතිංසං අගච්ඡ’හං.

955. තිංසක්ඛත්තුඤ්ච දෙවින්දො දෙවරජ්ජං අකාරයිං,
දිබ්බං සුඛං අනුභවිං අච්ඡරාහි පුරක්ඛතො.

956. පඤ්චසත්තතික්ඛත්තුඤ්ච චක්කවත්තී අහොස’හං,
පදෙසරජ්ජං විපුලං ගණනාතො අසංඛියං.

957. දෙවලොකා චවිත්වාන සුක්කමූලෙන චොදිතො,
පුරෙ වෙසාලියං ජාතො මහාසාලෙ සුඅඩ්ඪකෙ.

958. වස්සූපනායිකෙ කාලෙ දිප්පන්තෙ ජිනසාසනෙ,
මාතා ච මෙ පිතා චෙව පඤ්චසික්ඛාපද’ග්ගහුං.

959. සහ සුතෙන’හං සීඝං මම සීලං අනුස්සරිං,
එකාසනෙ නිසීදිත්වා අරහත්තමපාපුණිං.

960. ජාතියා පඤ්චවස්සො’හං අරහත්තමපාපුණිං,
උපසම්පාදයී බුද්ධො ගුණමඤ්ඤාය චක්ඛුමා.

961. පරිපුණ්ණානි ගොපෙත්වා පඤ්ච සික්ඛාපදාන’හං,
අපරිමෙය්යෙ ඉතො කප්පෙ විනිපාතං න ගච්ඡ’හං.

962. ස්වාහං යසමනුභවිං තෙසං සීලානවාහසා,
කප්පකොටිම්පි කිත්තෙන්තො කිත්තෙය්ය එකදෙසකං.

963. පඤ්ච සීලානි ගොපෙත්වා තයො හෙතු ලභාමහං,
දීඝායුකො මහාභොගො තික්ඛපඤ්ඤො භවාම’හං.

964. පකිත්තෙන්තො ව සබ්බෙසං අධිමත්තඤ්ච පොරිසං,
භවාභවෙ සංසරිත්වා එතෙ ඨානෙ ලභාමහං.

965. අපරිමෙය්යසීලෙසු වත්තන්තො ජිනසාවකො,
භවෙසු යදි රජ්ජෙය්ය විපාකො කීදිසො භවෙ.