2646. රථියං පටිපජ්ජන්තං ආහුතීනං පටිග්ගහං,
දිපදින්දං මහානාගං ලොකජෙට්ඨං නරාසභං.

2647. පක්කොසාපිය තස්සාහං සබ්බලොකහිතෙසිනො,
උපට්ඨාකො මයා දින්නො සිද්ධත්ථස්ස මහෙසිනො.

2648. පටිග්ගහෙත්වා සම්බුද්ධො නිය්යාතෙසි මහාමුනි,
උට්ඨාය ආසනා තම්හා පක්කාමි පාචිනාමුඛො.

2649. චතුනවුතෙ ඉතො කප්පෙ උපට්ඨාකමදං තදා,
දුග්ගතිං නාභිජානාමි උපට්ඨානස්සිදං ඵලං.

2650. සත්තපඤ්ඤාසීතො කප්පෙ බලසෙන සනාමකො,
සත්තරතනසම්පන්නො චක්කවත්තී මහබ්බලො.

2651. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2652. අපදානං සුගතානං කිත්තයිං’හං මහෙසිනො,
පාදෙ ච සිරසා වන්දිං පසන්නො සෙහි පාණිහි.

2653. ද්වෙනවුතෙ ඉතො කප්පෙ අපදානං පකිත්තයිං,
දුග්ගතිං නාභිජානාමි කිත්තනාය ඉදං ඵලං.

2654. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2655. විපස්සිස්ස භගවතො සඞ්ඝො සක්කතමානිතො,
ව්යසනං මෙ අනුප්පත්තං ඤාතිභෙදො පුරෙ අහු.

2656. පබ්බජ්ජ මුපගන්ත්වාන ව්යසනූපසමාය’හං,
සත්තාහාභිරතො තත්ථ සත්ථුසාසනකම්යතා.

2657. එකනවුතෙ ඉතො කප්පෙ යමහං පබ්බජිං තදා,
දුග්ගතිං නාභිජානාමි පබ්බජ්ජාය ඉදං ඵලං.

2658. සත්තසට්ඨිම්හිතො කප්පෙ සත්ත ආසුං මහීපතී,
සුනික්ඛමාති ඤායන්ති චක්කවත්තී මහබ්බලා.

2659. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2660. වෙටම්බරීති මෙ නාමං පිතුසන්තං මමං තදා,
මම හත්ථං ගහෙත්වාන උපානයි මහාමුනිං.

2661. ඉමෙ මං උද්දිසිස්සන්ති බුද්ධා ලොකග්ගනායකා,
තෙ’හං උපට්ඨිං සක්කච්චං පසන්නො සෙහි පාණිහි.