2562. චන්දභාගානදීතීරෙ උක්කුසො ආසහං තදා,
මහන්තං මච්ඡං පග්ගය්හ සිද්ධත්ථමුනිතො අදං.

2563. චතුනවුතෙ ඉතො කප්පෙ යං මච්ඡමදදිං තදා,
දුග්ගතිං නාභිජානාමි මච්ඡදානස්සිදං ඵලං.

2564. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2565. වන්දභාගානදීතීරෙ ආසිං වනචරො තදා,
සිද්ධත්ථමද්දසං බුද්ධං ගච්ඡන්තමනිලඤ්ජසෙ.

2566. අඤ්ජලිම්පග්ගහෙත්වාන උල්ලොකෙන්තො මහාමුනිං,
සකං චිත්තං පසාදෙත්වා අවන්දිං නායකං අහං.

2567. චතුනවුතෙ ඉතො කප්පෙ යමවන්දිං නරාසභං,
දුග්ගතිං නාභිජානාමි වන්දනාය ඉදං ඵලං.

2568. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2569. චන්දභාගානදීතීරෙ අහොසිං කින්නරො තදා,
විපස්සිමද්දසං බුද්ධං රංසිජාලසමාකුලං.

2570. පසන්නචිත්තො සුමනො පරමාය ච පිතායා,
පග්ගය්හ සලලං පුප්ඵං විපස්සිං ඔකිරිං අහං.

2571. චතුනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

2572. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2573. හිමවන්තස්ස වෙමජ්ඣෙ සරො ආසි සුනිම්මිතො,
තත්ථාහං රක්ඛසො ආසිං හෙඨසීලො භයානකො.

2574. අනුකම්පකො කාරුණිකො විපස්සී ලොකනායකො,
මමුද්ධරිතුකාමො සො ආගච්ඡි මම සන්තිකෙ.

2575. උපාගතං මහාවීරං දෙවදෙවං නරාසභං,
ආසයා අභිනික්ඛම්ම අවන්දිං සත්ථුනො අහං.

2576. එකනවුතෙ ඉතො කප්පෙ යං වන්දිං පුරිසුත්තමං,
දුග්ගතිං නාභිජානාමි වන්දනාය ඉදං ඵලං.

2577. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2578. සුවණ්ණවණ්ණො සම්බුද්ධො විපස්සී දක්ඛිණාරහො,
නදීතීරෙ ඨිතො සත්ථා භික්ඛුසඞ්ඝපුරක්ඛතො.

2579. නාවා න විජ්ජතෙ තත්ථ සන්තාරණී මහණ්ණවෙ,
නදියා අභිනික්ඛම්ම තාරෙසිං ලොකනායකං.

2580. එකනවුතෙ ඉතො කප්පෙ යං තාරෙසිං නරුත්තමං,
දුග්ගතිං නාභිජානාමි තරණාය ඉදං ඵලං.

2581. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

උක්ඛෙපී තෙල චන්දි ච දීපදො ච බිළාලිදො
මච්ඡො ජවො සලලදො රක්ඛසො තරණො දස
ගාථායො චෙත්ථ සඞ්ඛාතා තාළීසං චෙකමෙව ච.