2526. පබ්බතෙ හිමවන්තම්හි වාකචීරධාරො අහං,
අලොණපණ්ණභක්ඛොම්හි නීයමෙසු ච සංවුතො.

2527. පාතරාසෙ අනුප්පත්තෙ සිද්ධත්ථො උපගච්ඡි මං,
තාහං බුද්ධස්ස පාදාසිං පසන්නො සෙහි පාණිහි.

2528. චතුනවුතෙ ඉතො කප්පෙ යං පණ්ණමදිදං තදා,
දුග්ගතිං නාභිජානාමි පණ්ණදානස්සිදං ඵලං.

2529. සත්තවීසතිකප්පම්හි රාජා ආසිං යදත්ථියො,
සත්තරතනසම්පන්නො චක්කවත්තී මහබ්බලො.

2530. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2531. විපිනචාරී සම්බුද්ධො රුක්ඛමූලෙ වසී තදා,
පණ්ණසාලං කරිත්වාන අදාසිං අපරාජිතෙ.

2532. එකනවුතෙ ඉතො කප්පෙ යං පණ්ණකුටිකං අදං,
දුග්ගතිං නාභිජානාමි කුටිදානස්සිදං ඵලං.

2533. අට්ඨවීසෙ ඉතො කප්පෙ සොළසාසිංසු රාජානො,
සබ්බත්ථඅහිවස්සීති වුච්චරෙ චක්කවත්තිනො.

2534. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2535. සුවණ්ණවණ්ණං සම්බුද්ධං නිසින්නං පබ්බතන්තරෙ,
ඔභාසයන්තං රංසියා සිඛිතං සිඛිනං යථා.

2536. අග්ගජං පුප්ඵමාදාය උපගච්ඡිං නරුත්තමං,
පසන්නචිත්තො සුමනො බුද්ධස්ස අභිරොපයිං.

2537. එකතිංසෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

2538. පඤ්චවීසතිකප්පම්භි අහොසිං අමිතව්හයො,
සත්තරතනසම්පන්නො චක්කවත්තී මහබ්බලො.

2539. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

ථොමකෙකාසන චිතකං චම්පතො සත්තපාටපි
පාහනො මඤ්ජරී පණ්ණං කුටිදො අග්ගපුප්ඵියො
ගාථායො ගණිතා චෙත්ථ එකතාළීසමෙව ච.