2491. පදුමුත්තරො නාම ජිනො සයම්භූ අග්ගපුග්ගලො,
චතුසච්චං පකාසෙති දීපෙති අමතං පදං.

2492. බිම්බිජාලිකපුප්ඵානි පුඵු කත්වානහං තදා,
බුද්ධස්ස අභිරොපෙසිං දිපදින්දස්ස තාදිනො.

2493. අට්ඨසට්ඨිම්හිතො කප්පෙ චතුරො කිඤ්ජකෙසරා,
සත්තරතනසම්පන්නා චක්කවත්තී මහබ්බලා.

2494. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2495. කකුසන්ධො නාම නාමෙන සයම්භූ අපරාජිතො,
පවනා නික්ඛමිත්වාන අනුප්පත්තො මහානදිං.

2496. උද්දාලකං ගහෙත්වාන සයම්භූස්ස අදාසහං,
සංයතස්සුජුභූතස්ස පසන්නමානසො තදා.

2497. එකතිංසෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි පුප්ඵදානස්සිදං ඵලං.

2498. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

තුවර නාග නළිනා විරවී කුටිධූපකො
පත්තො ධාතු සත්තලියො බිම්බී උද්දාලකෙන ච
සත්තතිංසති ගාථායො ගණිතායො විභාවිහි.

2499. දෙවලොකෙ ඨිතො සන්තො විපස්සිස්ස මහෙසිනො,
ධම්මං සුණිත්වා මුදිතො ඉමං වාචමභාසහං.

2500. නමො තෙ පුරිසාජඤ්ඤ නමො තෙ පුරිසුත්තම,
බහුං ජනං තාරයසි දෙසෙන්තො අමතං පදං.

2501. එකනවුතෙ ඉතො කප්පෙ යං වාචමභණිං තදා,
දුග්ගතිං නාභිජානාමි ථොමනාය ඉදං ඵලං.

2502. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.