2495. කකුසන්ධො නාම නාමෙන සයම්භූ අපරාජිතො,
පවනා නික්ඛමිත්වාන අනුප්පත්තො මහානදිං.

2496. උද්දාලකං ගහෙත්වාන සයම්භූස්ස අදාසහං,
සංයතස්සුජුභූතස්ස පසන්නමානසො තදා.

2497. එකතිංසෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි පුප්ඵදානස්සිදං ඵලං.

2498. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

තුවර නාග නළිනා විරවී කුටිධූපකො
පත්තො ධාතු සත්තලියො බිම්බී උද්දාලකෙන ච
සත්තතිංසති ගාථායො ගණිතායො විභාවිහි.

2499. දෙවලොකෙ ඨිතො සන්තො විපස්සිස්ස මහෙසිනො,
ධම්මං සුණිත්වා මුදිතො ඉමං වාචමභාසහං.

2500. නමො තෙ පුරිසාජඤ්ඤ නමො තෙ පුරිසුත්තම,
බහුං ජනං තාරයසි දෙසෙන්තො අමතං පදං.

2501. එකනවුතෙ ඉතො කප්පෙ යං වාචමභණිං තදා,
දුග්ගතිං නාභිජානාමි ථොමනාය ඉදං ඵලං.

2502. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2503. විජහිත්වා දෙවවණ්ණං සභරියො ඉධාගමිං,
අධිකාරං කත්තුකාමො බුද්ධසෙට්ඨස්ස සාසනෙ.

2504. දෙවලො නාම නාමෙන පදුමුත්තරසාවකො,
තස්ස භික්ඛා මයා දින්නා විප්පසන්නෙන චෙතසා.

2505. සතසහස්සෙ ඉතො කප්පෙ යං කම්මමකරිං තදා,
දුග්ගතිං නාභිජානාමි පිණ්ඩපාතස්සිදං ඵලං.

2506. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2507. ආනන්දො නාම සම්බුද්ධො සයම්භු අපරාජිතො,
අරඤ්ඤෙ පරිනිබ්බායි අමනුස්සම්හි කානනෙ.

2508. දෙවලොකා ඉධාගන්ත්වා චිතං කත්වානහං තදා,
සරීරං තත්ථ ඣාපෙසිං සක්කාරඤ්ච අකාසහං.

2509. එකනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි බුද්ධපූජායිදං ඵලං.

2510. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2511. හිමවන්තස්ස අවිදූරෙ විකතො නාම පබ්බතො,
තස්ස වෙමජ්ඣෙ වසති සමණො භාවිතින්ද්රියො.

2512. දිස්වාන තස්සොපසමං විප්පසන්නෙන චෙතසා,
තීණි චම්පකපුප්ඵානි ගහෙත්වාන සමොකිරිං.