2432. අරුණවතියා නගරෙ අහොසිං පූපිකො අහං,
මම ද්වාරෙන ගච්ඡන්තං සිඛිනං අද්දසං ජිනං.

2433. බුද්ධස්ස පත්තං පග්ගය්හ සාලපූපං අදාසහං,
සම්මග්ගතස්ස බුද්ධස්ස විප්පසන්නෙන චෙතසා.

2434. එකතිංසෙ ඉතො කප්පෙ යං ඛජ්ජකමදාසහං.
දුග්ගතිං නාභිජානාමි සාලපූපස්සිදං ඵලං.

2435. ඉතො චුද්දසකප්පම්හි අසොසිං අමිතඤ්ජලො,
සත්තරතනසම්පන්නො චක්කවත්තී මහබ්බලො.

2436. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2437. තිවරායං පුරෙ රම්මෙ නළකාරො අහං තදා,
සිද්ධත්ථෙ ලොකපජ්ජොතෙ පසන්නා ජනතා තහිං.

2438. පූජත්ථං ලොකනාථස්ස කිලඤ්ජං පරියෙසති,
බුද්ධපූජං කරොන්තානං කිලඤ්ජං අදදිං අහං.

2439. චතුනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි කිලඤ්ජස්ස ඉදං ඵලං.

2440. සත්තසත්තතිකප්පම්භි රාජා ආසිං ජුතින්ධරො,
සත්තරතනසම්පන්නො චක්කවත්තී මහබ්බලො.

2441. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2442. විපස්සිනො භගවතො බොධියා පාදපුත්තමෙ,
පසන්නචිත්තො සුමනො කාරෙසිං වෙදිකං අහං.

2443. එකනවුතෙ ඉතො කප්පෙ කරොසිං වෙදිකං අහං,
දුග්ගතිං නාභිජානාමි වෙදිකාය ඉදං ඵලං.

2444. ඉතො එකාදසෙ කප්පෙ අසොසිං සුරියස්සමො,
සත්තරතනසම්පන්නො චක්කවත්තී මහබ්බලො.

2445. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2446. නගරෙ අරුණවතියා වණ්ණකාරො අහං තදා,
චෙතියෙ දුස්සභණ්ඩානි නානාවණ්ණං රජෙසහං.

2447. එකතිංසෙ ඉතො කප්පෙ යං වණ්ණං රජයිං තදා,
දුග්ගතිං නාභිජානාමි වණ්ණදානස්සිදං ඵලං.