2391. සිද්ධත්ථස්ස භගවතො වෙදි කාරාපිතා මයා,
ආරක්ඛො ච මයා දින්නො සුගතස්ස මහෙසිනො.

2392. තෙන කම්මවිසෙසෙන න පස්සෙ භයභෙරවං,
කුහිඤ්චි උප්පන්නස්ස තාසො මය්හං න විජ්ජති.

2393. චතුනවුතෙ ඉතො කප්පෙ යං වෙදිං කාරයිං අහං,
දුග්ගතිං නාභිජානාමි වෙදිකාය ඉදං ඵලං.

2394. ඉතො ඡට්ටම්භි කප්පම්හි අපස්සෙන සනාමකො,
සත්තරතනසම්පන්නො චක්කවත්තී මහබ්බලො.

2395. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2396. විපස්සිස්ස භගවතො අග්ගිසාලමදාසහං,
ව්යාධිතානඤ්ච ආවාසං උණ්හොදකපටිග්ගහං.

2397. තෙන කම්මෙනයං මය්හං අත්තභාවො සුනිම්මිතො,
ව්යාධාහං නාභිජානාමි පුඤ්ඤකම්මස්සිදං ඵලං.

2398. එකනවුතෙ ඉතො කප්පෙ යං සාලමදදිං තදා,
දුග්ගතිං නාභිජානාමි අග්ගිසාලායිදං ඵලං.

2399. ඉතො සත්තමකෙ කප්පෙ එකො’සිං අපරාජිතො,
සත්තරතනසම්පන්නො චක්කවත්තී මහබ්බලො.

2400. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2401. නාරදො ඉති මෙ නාමං කස්සපො ඉති මං විදූ,
අද්දසං සමණානග්ගං විපස්සිං දෙවසක්කතං.

2402. අනුබ්යඤ්ජනධරං බුද්ධං ආහුතීනං පටිග්ගහං,
අඞ්කොලපුප්ඵං පග්ගය්හ බුද්ධස්ස අභිරොපයිං.

2403. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

2404. චතුසත්තතිතො කප්පෙ රොමසො නාම ඛත්තියො,
ආමුත්තමාලාභරණො සයොග්ගබලවාහනො.

2405. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.