2355. කුසාටකං ගහෙත්වාන උපජ්ඣායස්ස’හං පුරෙ,
මන්තං ච අනුසික්ඛාමි කණ්ඩභෙදස්ස පත්තියා,

2356. අද්දසං විරජං බුද්ධං ආහුතීනං පටිග්ගහං,
උසභං පවරං අග්ගං තිස්සං බුද්ධං ගණුත්තමං.

2357. කුසාටක පත්ථරිතං අක්කමන්තං නරුත්තමං,
සමුග්ගතං මහාවීරං ලොකජෙට්ඨං නරාසභං.

2358. දිස්වා තං ලොකපජ්ජොතං විමලං චන්දසන්නිභං,
අවන්දිං සත්ථුනො පාදෙ විප්පසන්නෙන චෙතසා.

2359. චතුනවුතෙ ඉතො කප්පෙ යං අදාසිං කුසාටකං,
දුග්ගතිං නාභිජානාමි කුසාටකස්සිදං ඵලං.

2360. සත්තතිංසෙ ඉතො කප්පෙ එකො ආසිං ජනාධිපො,
සුනන්දො නාම නාමෙන චක්කවත්තී මහබ්බලො.

2361. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2362. නිසින්නො පාසාදවරෙ නාරීගණපුරක්ඛතො,
ව්යාධිතං සමණං දිස්වා අභිනාමෙසහං ඝරං.

2363. උපවිට්ඨං මහාවීරං දෙවදෙවං නරාසභං,
සප්පිතෙලං මයා දින්නං සිද්ධත්ථස්ස මහෙසිනො.

2364. පස්සද්ධදරථං දිස්වා විප්පසන්නමුඛින්ද්රියං,
වන්දිත්වා සත්ථුනො පාදෙ අනුසංසාවයිං පුරෙ.

2365. දිස්වා මං සුප්පසන්නත්තං ඉද්ධියා පාරමිඞ්ගතො,
නභං අබ්භුග්ගමී ධීරො හංසරාජාව අම්බරෙ.

2366. චතුන තෙ ඉතො කප්පෙ යං දානමදදිං තදා,
දුග්ගතිං නාභිජානාමි සප්පිතෙලස්සිදං ඵලං.

2367. ඉතො සත්තරසෙ කප්පෙ ජුතිදෙව සනාමකො,
සත්තරතනසම්පන්නො චක්කවත්තී මහබ්බලො.

2368. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2369. පියදස්සිස්ස භගවතො චඞ්කමං සොධිතං මයා,
නළකෙහි පටිච්ඡන්නං වාතාතපනිවාරණං.

2370. පාපං විවජ්ජනත්ථාය කුසලස්සුපසම්පදා,
කිලෙසානං පහානාය පදහිං සත්ථුසාසනෙ.

2371. ඉතො එකාදසෙ කප්පෙ යං අග්ගිදෙවොති විස්සුතො,
සත්තරතනසම්පන්නො චක්කවත්තී මහබ්බලො.

2372. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

හත්ථි පානධි සච්චඤ්ච එකසඤ්ඤී ච රංසියො
සණ්ඨිතො තාලවණ්ටී ච තථා අක්කන්තසඤ්ඤකො
සප්පි පාපනිචාරී ච චතුපඤ්ඤාස ගාථකාති.