2324. ආරඤ්ඤකස්ස ඉසිනො චිරරත්තතපස්සිනො,
වුද්ධස්ස භාවිතත්තස්ස අදාසිං පානධිං අහං.

2325. තෙන කම්මෙන දිපදින්ද ලොකජෙට්ඨ නරාසභ,
සබ්බං යානං අනුභොමි පුබ්බකම්මස්සිදං ඵලං.

2326. චතුනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි පානධිස්ස ඉදං ඵලං.

2327. සත්තසත්තති’තො කප්පෙ අට්ඨ ආසිංසු ඛත්තියා,
සුයානා නාම නාමෙන චක්කවත්තී මහබ්බලා.

2328. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2329. වෙස්සභූ තම්හි සමයෙ භික්ඛුසඞ්ඝපුරක්ඛතො,
දෙසෙති අරියසච්චානි නිබ්බාපෙන්තො මහාජනං.

2330. පරමකාරුඤ්ඤපත්තොම්භි සමිතිං අගමාසහං,
සොහං නිසින්නකො සන්තො ධම්මස්සොසිං සත්ථුනො.

2331. තස්සාහං ධම්මං සුත්වාන දෙවලොකමගච්ඡහං,
තිංසකප්පානි දෙවෙසු අවසිං තත්ථහං පුරෙ.

2332. එකතිංසෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි සච්චසඤ්ඤායිදං ඵලං.

2333. ඡබ්බීසම්හි ඉතො කප්පෙ එකො ආසිං ජනාධිපො,
එකඵුසිතනාමෙන චක්කවත්තී මහබ්බලො.

2334. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2335. දුමග්ගෙ පංසුකූලිකං ලග්ගං දිස්වාන සත්ථුනො,
අඤ්ජලිං පග්ගහෙත්වාන පංසුකූලං අවන්දිහං.

2336. එකතිංසෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි බුද්ධපූජායිදං ඵලං.

2337. පඤ්චවීසෙ ඉතො කප්පෙ එකො ආසිං ජනාධිපො,
අමිතාභොති නාමෙන චක්කවත්තී මහබ්බලො.

2338. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.